Guwahati Iaiong 21: U Border minister jong ka jylla Assam u Siddique Ahmed ha ka sien kaba nynkong ka jong u ban leit jngoh ia ki khappud kaba don bad ka jylla Meghalaya ia ki bynta jong ka Lokhra kaba jngai tang 18 km na ka nongbah jong ka jylla Assam.
Kane ka jingleit ka jong u ka la wanrah ka jingkyrmen ia ki briew kiba don ha ka thain Lokhra bad ka bynta jong ka ka garbhanga reserve forest, namar kumba ka long mynta na ki 14 tylli ki shnong kiba donha kane ka jaka kim don ia ka umbam umdih ki skul, ka light bad kiwei kiwei kiba donkam.
Na ka liang jong u tei umyntri u la ong ba na ka daw ba ka sorkar Assam ka la ieh bein ia ki ja jylla Meghalaya ka la wan tan bud da kaba wan seng ia ki skul bad ai ia ki umbam umdih dei ha kane ka rukom ba ka jylla Assam ka duh ia la ki jong ki jaka puta.
Kane ka jingleit jngoh jong u myntri ka Assam ia kine ki jaka ka long ha ka por ba ka dang don ka jingiakren hapoh ka iing dorbar thawain ka jylla Meghalaya ha kaba ia dei bad kane ka jingiakajia pud.Haba ia dei bad ka jingia kajia pud u myntri u la ong ba ka jylla Assam ka ia tyngkhuh bad saw dong ki jylla namar mynshuwa ki dei ki bynta jong ka Assam, kum ka Meghalaya, Nagaland, Mizoram. Na pdeng kine ki don kiba la ujor sha iing bishar.
Na ka liang jong ki paidbah ki la ai ia ka dorkhas sha u myntri ka jylla Assam ha kaba ki la dawa ba ka sorkar ka dei ban ai pata ia ki namar kumba ka long mynta wat la ki la don bun snem ha kine ki jaka kim shym don ia ki kot ki sla ban kam trai ia ka jaka kaba ki shong ki sah, nalor katei ki la pan ruh ia ka jingdon kam kum ki jaka ai jingsumar bad kiwei kiwei kaba ki don kam man ka sngi.
Kine ki paidbah ki la pynpaw ba bun sien ki sngew ba ki dei ban leit noh bad ka jylla Meghalaya namar ba ka jylla Meghalaya ka ai jingiarap khma bha kila pynsngew ha u myntri ka jylla Assam. Ha kane ka thain Garbhanaga reserve forest ki don 14 tylli ki shnong, 12,000 ngut ki nongshong shnong bad 7000 ngut kiba la ioh ban thep vote.
Ha dien ba la ioh sngew ia ka jingeh jong ki paidbah na ka liang jong u myntri u la ong ba na ka bynta ka rai ka por jong ki paidbah kane ka thain ka sorkar kan sa ai ia ki skhim pynroi kaban kot sha ka T. 75 Lak tyngka.(SP News)
