Shillong, Nailur 26: Katkum ka khubor kaba la phah da ka kong Nebi Rapthap bad president jong ka KWWADA bad ka kong Aganes Kharshiing president jong ka CSWO ki la pynrem jur ia ki bor ba dei peit ia ka District Administration kiba la leh ia ki kam buit poh ban phah ia ki nongbuid ban pynshit ia ki samla ban pynkulmar ha motphran.
Ha ka kyrwoh kaba la phah da kitei ki ar tylli ki seng la ong ba na ka liang jong ki pulit ki don ar ngut kiba la sakhi ia kane ka jingiakhih kaba jai jai ka jong ki u Ralte bad ka Joyti Wahlang ba ki tip ba ka jingialang ka long kaba jai jai. Lada ki pulit ki lah ban khang ia ka jingkwah shong kyllain mungor ka jong ki ha Additional Secretarait balei kam lah ban khang ia ki ha Motphran.
Kine ki ar tylli ki seng ki pynrem jur ia kane ka jingthew maw ia ki pulit kynthei kiba don ha Motphran, ia kane ka jingleh yn nym lah ban pdiang, ka kamram jong ki pulit ha katei ka sngi ka long tang ba kin pyndem ia ka kam ka jong ki, la ong ka kyrwoh.
Na ka liang jong kitei ki ar tylli ki seng kynthei ki la ong ba ha kum kine ki khep kin don ki nongshim kabu bad ka sorkar ka tip ba lada pynlong ha Additional Secretariat kan nym mih kano kano ka jingklumar bat kumta la rah ia ki sha Madan Student ban ioh ia ka lad ban pynmih ia ki huri hura.(SP News)
