Shillong, Risaw 04: U shnongknor jong ka iing dorbar thawain ka jylla u AT Mandal mynta ka sngi u la kyntait ban pdiang ia ka Adjournment Motion kaba la wanrah da ki liang pyrshah ban ia kren halor ka jinghuri hura ha ka jylla na ka dawjong ka jingdawa jong ki seng bhalang ia ka Inner Line Permit.
Ki liang pyrshah ki la leit ban ai ia ka Adjournment motion sha u shongknor ha ka 3 tarik mynta u bnai. Ka jingkyntait jong u Speaker ia kane ka adjournment motion ka dei namar ba ka la wan shuwa ka Resolution kaba la dep ban pdiang, kaba dei ia kane ka juh ka phang. Ka iing kan nym lah ban pdiang namar ka phang ban ia kren ka dei ka ia juh.
Ha dien ba u shongknor ym shym la ailad ia kane ka adjournment motion ki liang pyrshah ki la leit tur sha ka miet jong u shongknor ban leit tied miej bad dawa na u ba u dei ban shah hynrei na ka liang jong u speaker u la pynsangeh noh shipor ia kane ka jingiahsong dorbar.
Ha ka jingkren jong u bah Ronnie V Lyngdoh u la ong ba ia ka sorkar la shu pynklumar da kine ki briew kiba kwah ILP la ka long ha bar lane wat hapoh ka iing dorbar.
Kane ka jingiakylliang ktien hapdeng ki liang pyrshah bad ki liang synshar ka la neh kumba shiteng kynta ei ei. Ha dien ba la shong biang ka iing dorbar na ka liang jong u Bah Ardent Basaiawmoit u la tyrwa ban weng noh ia ka resolution ka jong ka jong u hynrei u la dawa ba dei ban ia tai halor kane ka phang ia ka ILP.
Na ka liang jong u myntri rangbah ka jylla u la kyntu ia ki liang pyrshah ba ki dei ban burom ia ka rai jong u speaker. Kaba khlam phylla ka long ba ha ka por ba ka don ka jingkynmaw burom ia ki nongmih khmat kiba la khla dnoh ki liang pyrshah ki la mih sha bar.(SP News)
