Shillong, Jylliew 19: Ka Dorbar Grand Council of Chiefs of Meghalaya, (kaba kynthup Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ki Sirdarship, Ki Dolloi, Council of Nokmas) ha ka jingiakynduh kaba kyrkieh mynta ka sngi 19 June 2013, ka pynpaw ia ka jing sngewnguh ia u Bah PN Syiem, MDC, & MLA, CEM KHADC, ia ka jingmynjur jong u bad ka iing Dorbar KHADC, ban phah shwa ia ka Village Administration Bill 2013 sha ka Select Committee, ban bishar bniah ia ki kyndon jong katei ka Bill. Ka Dorbar ka kyntu ia ki bor KHADC ba khot ia ki Hima ba kin ai ka jingpynsngew jong ki halor katei ka draft VA Bill 2013 kaba la pynrung mynnin ka sngi.
Ka Dorbar ka sngewdei ban pynpaw sha ki bor KHADC ba haduh kine ki sngi, na ki 25 Khasi States, ki bor KHADC ki la thaw ia ki Act ha ki 12 tylli ki Hima Khasi States, katba ki 13 tylli ki Hima Khasi States kim pat don ki Acts lane ki Rule, ki synshar beit katkum ki Riti Dustur (oral tradition) kiba khlem pat pynlong kum ki Act lane ki Rule.
Ka Dorbar ka pynpaw ia ka jingsngewkhia, ban kdew hangne ba lait noh ki ar tylli ki Khasi States kata ka Hima Nongstoin bad Hima Maharam, kiba la don ruh ki Rules ba la pynjari da ki bor KHADC, kiwei pat ki 23 tylli ki Hima Khasi States kim don Rule ba la thaw da ki bor KHADC, kaba la ialam bad plie lad bun sien sha ka jing mushlia ki bor bapher bapher jong ka sain pyrthei, kat haduh ban da kiew iing lieh iingsaw bad teng teng shaduh ban da poi shaduh ka iingbishar kaba khlieh (Supreme Court) duh ka Ri india. Kine ki jinglong ki wanrah ki jingeh kiba khraw ia u khun u hajar haba um don u Syiem uba pura bad khamtam ka wanrah ia ka jingbym iaineh ki jingsynshar (unstable administration).
Shuh shuh, ha ki 29 tylli ki Elaka Sirdarship, ki bor KHADC katkum ka website www.khadc.nic.in ( Acts, Laws, Rules, Regulation) haduh kine ki sngi dang dep thaw bad pynjari tang 7 tylli ki Act jong ki Hima Sirdarship kiba ngi khot (British India) ym kum ki Khasi States kiba la don ka kyrdan (Indian States). Ki dang don ruh ki Hima/Elaka kiba la shah pynkat bad shah pynhiar kyrdan ha ka por phareng ia kaba ka Dorbar ka kyrpad ia ki bor KHADC ban thaw lad ban kyntiew biang ia ki katto katne tylli ki Hima sha ka kyrdan kaba ki dei ban long.
Ka Dorbar ka kyntu jur ia ki bor KHADC ban pynbeit pyndam noh ia ka kyrteng Hima Raid Mynsaw kumba ka dei ban long sha ka kyrteng Hima Nongmynsaw kumba la ithuh naduh ki por mynbarim bad katkum ki sakhi satar, bad kumjuh ruh kaba la don jingithuh naduh ki por phareng namar katei ka jingthaw thymmai ka ktah ia ka jingpynrshang ban pynbeit ia u pud u sam jong ka Ri Khasi hapdeng ka Meghalaya bad Assam, ha ki thain Langpih.
Katba ha Jaintia Hills District Council haduh kine ki sngi ym ki 19 tylli ki Elaka ym pat don kano kano ka Act lane ki Rule na ka bynta kitei ki 18 Elaka Dolloiship bad kawei ka Sirdarship. Katba ha Ri Lum Garo ym pat don kano kano ka Act ne ka Rule na ka bynta ki nongsynshar Nokma.
Kumta, ka Dorbar Grand Council of Chiefs of Meghalaya, ka sngewdei ban kyntu jur ia baroh lai tylli ki bor Autonomous District Council hapoh ka jylla Meghalaya ba kin shim khia ban pynsted ban thaw ia ki Ain ki Rule jong ki Hima/Elaka bapher bapher, kum shi bynta ban pynneh pynsah bad ban iada ia ki Riti ki Dustur jong ka jaidbynriew Khasi, Jaintia bad Garo hapoh ka jylla Meghalaya.(SP News)
