Jowai, Nailar 23: Namar ka jingpyrkhing palat ia ka rukom applai Birth Certificate ha West Jaintia Hills District kat haduh ki paidbah jong ka West Jaintia Hills ki la ud ba ka jynjar palat, ka AJYWO Central Governing Body mynta ka sngi hapoh ka jingialam I Bah M H Dkhar President jong ka seng, ka la ia kynduh ia u Deputy Commissioner jong ka West Jaintia hIlls Ditrict bad kyrpad ia u ban pynjynsur ia ka rukom applai Birth Certificate ki paidbah ha West Jaintia hIlls District khnang ban ym pynjynjar ia u paidbah khamtam ia u duk u suk ba pli.
U Bah M H Dkhar u la ong ba ha ka dorkhast kaba ka AJYWO ka la ai sha u DC ka WJHD, ka seng ka la pynpaw ia ka jingsngewbynniaw ka ba jur haduh katta katta halor ka jingpyrkhing palat ia ka rukom applai Birth Certificate ha ka district kat haduh ba ka la ktah shi katdei eh ia u paidbah khamtam ia ki kup shilliang ki sem shilliang bad kito kiba wan na ki thain nongkyndong.
Kat kum katei ka dorkhast ka seng ka la pynsngew shuh shuh ha u DC, ba ban applai Birth Certificate mynta ha WJHD, ki paidbah ki hap ban ialam bad u plider sa ki sakhi bad ruh sa ka jingslem ban ioh ia ka Birth Certificate ka ba shim por da ki taiew ha ryngkat ka pisa kaba da ki hajar tyngka tad haduh ban da ioh ia kawei ka Birth Certificate.
“Kane ka rukom Birth Certificate ha WJHD, ka la ktah shi katdei eh ia ki paidbah khamtam ia u kup shilliang u sem shilliang bad ruh ia kito ki ba wan na ki thain nongkyndong namar ym tang ba ki lut ki pisa hynrei wat ka sngi bad ka por ruh namar ki hap wan rwing man ka sngi na ka bynta kawei ka Birth Certificate” ong u Bah M H Dkhar.
Kumta na ka bynta ka jingmyntoi jong u paidbah, khamtam ki ba duk ba rangli, ka seng ka la kyrpad ia u DC ka WJHD ba un tuklar lem ia kane ka kam bad ruh ka seng ka kyrpad ruh ia ka Ingbishar ka District and Session Court ka WJHD ba kan kham pynsynjor ia kane ka rukom applai Birth Certificate ha WJHD khnang ban pynsuk ia u paidbah khamtam ia u duk u suk.
Ka seng shen kan sa leit ia kynduh ruh ia ka District and Session Judge jong ka WJHD ban kyrpad ruh ia ka ban pyrkhat lem ia kane ka jingjynjar jong u paidbah ha ka jingapplai Birth Certificate.
Ka AJYWO ka kyrpad ym tang ia u DC bad ka District & Session Court ban pyrkhat lem ia kane ka jingjynjar u paidbah hynrei ka seng ka kyrpad ruh wat ia kito baroh ruh ki ba dei ban iarap ia ki paidbah ha ka ban applai Birth Certificate, ba kin sngewbha ban iarap ia ki bapli ki paidbah kat ba ki lah ei khnang ba kin ym jynjar than. Ka seng ka kyrpad jur ruh ia ka District and Session Court jong ka WJHD ban pynsted katba lah ia ka rukom applai Birth Certificate khnang ba u paidbah un ym jynjar than.(SP News)
