Shillong, Naiwieng 13: Ka Barak Valley Khasi Jaintia Welfare Organisation(BVKJWO) ka Sengkaba kdup iaki paid Hynniewtrep kiba shong basah hapoh Barak Valley Assam, haka jingpyllait khubor da u General Secretary Samla Sebastian Pakyntein kala dawa jur naka sorkar ban pyntreikam (Implement) noh shisyndon iaka Inner Line Permit hapoh ka jylla Meghalaya bad ha kajuh ka por ka seng kala rai ruh ban ai ka jingkyrshan ba pura iaka jingiakhih dawa pyntreikam iaka ILP daki sengbhalang bapher bapher
hapoh Meghalaya.
Ka Seng kala pynpaw iaka jingbynniaw halor ka jingleh kyllut jong ka sorkar iaka jingdawa ki sengbhalang ban pyntreikam iaka ILP. ‘Kane ka jingleh kyllut bad pyneh triang ka sorkar iaka jingdawa ki Sengbhalang ka pyni ba ki Minister ka Jylla Meghalaya kimdon ka jingkitkhlieh bad shimkhia iaki paidbah ka Meghalaya bad ka pynpaw
shai kdar ruh ba u CM udei u nongialam ba synshar donbor(dictator) ubym sngap iaka sur u paidbah’ la ong u General Secretary ka Seng. Ka long shisha ka ba i pangnud bad sngewpoh ban iohi ba haba ngi leit Guwahati ngi iohi ba ha shilynter u surok ha Meghalaya ym iohi durkhmat Khasi bad Garo shuh hynrei ladap satang da u mynder suda, kaba long thik kum ka jylla Tripura hakaba ki trai jylla kila
kylla ritpaid.
Kane ka jingbun u mynder kadei tang namarba ymdon ki ain kiba khlain kiban tehlakam iaka jingioh laitlan u poiei. Kumta ka sorkar kadei ban pyntreikam noh shisyndon iaka ILP ha Meghalaya katba ympat dier kapor.Ka Seng ka buh ruh ka jingkyntu iaki nongialam Sengbhalang ba iakhih ILP ba kimdei ban sangeh ka jingiakhih katba ka sorkar kam pat pyntreikam iaka ILP ha Meghalaya hynrei ki dei ban iakhun haduh ban
daioh iaka jingjop.(SP News)
