Shillong, Rymphang 19: Ka seng lehnoh National Hynñiewtrep Liberation Council (HNLC) ha ka jingpynlait khubor mynta ka sngi lyngba jong u Publicity Secretary, u Bah Saiñkupar Nongtraw la ong ba mynta ka 67 snem ki hynniew tylli ki jylla ka dong shatei lam mih ngi jong ka Ri India ki long long ki sohpdung ha ka jinglong nong India la kynnoh.
Ha kane ka kyrwoh la ong ba kim kwah ban ia long kawei bad ka Ri India hynrei kin ia leh ban ioh ia la ka jong ka Ri, la ong ba ha ka por jong ka jingwan jong u nongialam ka niam Bhudhist ha Shillong u Dalai Lama u la kyrpad ia ka sorkar India ba kin iarap lem ban pynlait ia ka Tibet na ka kti jong ka China.
Kumba ka paw la ong ba ka sorkar India kala pynpaw ia ka jingkloi ka jong ka ban iarap ia ki paidbah Tibet, na ka liang jong ka seng HNLC ka ong ba ka Ri India ka dei ban pynbeit shuwa ia ki jingeh kiba don hapoh jong ka kam dei ban leit mushlia bad kiwei ki ri.
U Bah Nongtraw u la ong ba ki seng lehnoh kane ka thian shatei lam mih ngi jong ka Ri India ki don ia ka jingsngew lada dang ia tylli bad ka Ri India kane ka jingshah niew bein kan dang iai bteng bad ba kan dang sniew shuh shuh.
La ong ba ha ka jylla Meghalaya, Assam bad Manipur ka sorkar kala khap rip iala ki jong ki khmat da kaba kyntait ban pyntrei kam ia ka Inner Line Permit bad kane ka paw shai kdar ba ka sorkar India kam suid niew ia ki briew kane ka thain, u bah Nongtraw u la ong ba ki don ia ka hok ban shim ia la ka jong ka rai ha ka synshar khaddar. Lada ka sorkar India kam kwah ban kin ia leh pyrshah ka dei ban sangeh shisyndon ban pynkhien ia la hok long briew man briew.
Ka seng HNLC ka kyntu ia ki seng bhalang kiba ia khih na ka bynta ka ILP ki dei ban pynlong ia kane ka jingiakhih kum ka jingiakhih ban iada ia ka hok long briew man briew kane ka dei ka hok ka jong ki paidbah ban iada ia la de.
Wat la ka sorkar ka kem lut ia baroh ki nongialeh ban ioh ia ka ILP, hynrei ka rai jong ka United Nation ka don ia ka hok ban rai da lade ia lade.
Kane ka jingpynkhein ia ka hok long briew dei ban ujor sha ka United Nation bad kane ka kynthuh ia ki khlieh nongsynshar jong ka Ri India naduh ka sorkar pdeng haduh ka sorkar jylla bad ia kine yn bishar da ka iing bishar jong ka pyrthei. La iohi ba lada rah ia ka ILP hapoh parliament kan nym trei kam. Ka jingkylli mynta ka long sa katno ngut ki samla ki ban dang shah siat bad sha kem ha ka sorkar.
Ha kane ka jingpynlait khubor na ka liang jong ka seng HNLC ka don ka jingshaniah ha ka UN bad lada ka UN ka lah ban tuklar kum ha Syria, East Timor, South Sudan, Kosova, balei kam lah ban tuklar ha kane ka Ri ruh kum juh.
Na ka liang jong ka seng HNLC ka ong ba kaei kaba u Fedrick Kharmawphlang Vice President ka KSU bad ki 13 kiwei ki samla kiba la pyniasoh bad ka seng HNLC bad ha ka juh ka por ka khot kawer ia kiwei ruh ba kin leit pyniasoh bad katei ka seng la ong u Bah Nongtraw ban ia leh na ka bynta ka bri u hynniewtrep.(SP News)
