Shillong, Nailur 26: Ka Khun Hynñiewtrep National Awakening Movement (KHNAM) ka dap da ka jingsngewkhia halor ka jingdon jong ki briew kiba pyrshang ban shim kabu haba iadei bad ka jingiakhih ba khot pynlong da ki sengbhalang bapher bapher halor ka jingdawa ban pyntreikam ia ka Inner Line Permit ha ka Jylla.
Ki jingjia kum ka jingkynnoh kawang petrol bomb kylleng kylleng kumba la paw ha ki lad pathai khubor ha kine ki sngi jingiakhih khamtam ki jingjia pluh dukan ha ïewduh bad kawei ha thaiñ Khyndai Lad hajan Dreamland kaba jia mynta ka sngi, ka lah ban dei ba don ki briew kiba shim kabu ha kum kane ka por khnang ban pynbud nam ia ki sengbhalang.
Ka KHNAM ka kyntu jur ia ki briew ka aiñ ban da ïit bad wad bniah ia ki briew kiba donkti ym ban shu kem naphang ia ki briew ba lui lui khamtam ban shu kynnoh ba ki dei ki Khasi kiba donkti. Namarkata, ki pulit ki dei ban tohkit bniah ban lap ia ki jingshisha namar ki paidbah kim lah ban ngeit bad pdiang ba kin don ki briew ba nabar ki ban leh ia kum kine ki jait kam namar kine ki jaka ki la long kum ki High Security Zone ha kaba la ker kut da ki nongpahara.
Ka KHNAM ka kyntu ia ka Sorkar khamtam ka Myntri ba peit ka tnat kam pohïing ba ka dei ban bthah ia ki pulit ban kem shwa ia ki trai jong kine ki dukan ban lap ia ki jingshisha namar kum kine ki jingjia ym lah ban tip ia ka jingthmu ba sha lyndet jong kine ki khamtam lei lei kiba ju ioh jingmyntoi lada pluh ki dukan namar ki la dep buh Insurance ia ki dukan jong ki.
Ka KHNAM ka kyntu ruh ia ki paidbah ba kim dei ban shu ngeit bad sngap ia ka buit sianti jong ki myrsiang kup snieh langbrot namar ngim kwah ba ki samla Khasi kin shu shah pharep khlem da don nongrim bad shah kem.
Kumta ka KHNAM ka kyntu jur ia ki pulit ban kem shwa ia ki ki trai dukan bad pynlong ka jingtohkit kaba bniah khnang ban lap ia ki jingshisha bad lada ka Sorkar bad ki bor jong ka aiñ kim lah ban kem, ka paw ba ka don kaei kaei sha lyndet.(SP News)
