Shillong, Jymmang 23:Ka Ri Umsnam People Aliance (RUPA) Ri Bhoi Zone kaba lyngba u President bah Alost Nongpoh, ka la kyntu jur ia ka tnad khlaw ka sorkar Jylla kaba dei peit ban pynneh pynsah ia ka mariang ba kan shim khia ban thung dieng ia ki rud ka surok Shillong By Pass naduh Lad Umroi haduh ka Lad ha Mawryngkneng.
Ula ong ba ka seng ka kyrpad ia ka sorkar jylla lyngba ka tnad khlaw ban iarap thung dieng ia ki rud jong katei surok kum shi bynta ban pynneh ia ka mariang bad khamtam ruh ba ki paidbah nongleit nongwan kin ioh lem ka jingtngen haba ki iaid lyngba katei ka surok bad ula bynrap ruh ba ki paidbah nongshong shnong ha ki rud katei ka surok bah ki shem shitom ban iaid ban ieng ha kine ki sngi namar ka jingjur palat ka jingshit jong ka sngi.
“Kumta lada ka sorkar ka kloi ban thung dieng ha shilynter ia katei ka surok naduh Lad Umroi haduh ka lad ha Mawryngkneng, kan nang pynitynnad shuh shuh ia katei ka surok bah bad kumjuh ka iarap ia ki nongleit nongwan ban ioh rieh tngen ha ka por ba shit eh ka sngi.” U la bynrap.(SP News)
