Shillong, Risaw 03: Ka kynhun kaba 19 ngut na ka Grand Council of Chiefs of Meghalaya, ki l
a ia kynduh ia u Dr Mukul Sangma, Chief Minister, Shri. HDR Lyngdoh, District Council Affairs Minister, bad ia i Smt. Roshan Warjri, Home Minister, ha kaba la ai ia ka dorkhas halor ka i) Kam kaba mih na ka shithi na ka Ministry Home Affairs(MHA); ii) ka jingdonkam ban pynkhreh na ka liang ka Sorkar jylla ia kiba bun tylli ki ain kiban khmih bad peit ia ka Influx, Infiltration; ka khaii pateng lyngba ki Border Hats kiba don ha ki pud u sam jong ka India bad Bangla; iii) ka jingeh kaba mih na ka Meghalaya Land Transfer Act ha kaba iadei bad ki bad ka jingeh jong ki 11 Hima /Elaka kiba don sha u pud Assam ba kin lum ia ka khajna bad ban register ia ki Land Holding kynthup ia ka bai renew bad ka bai register man ka snem na kito ki briew ha ki thain border kiba la don ki kot ki sla kiba rim ha ki thain Assam –Meghalaya Boundary iv) ban thaw lad ban iarap ia ki paidbah namar ka jinghiar ka khaii pateng namar ka jingduna ki nongwan jngohkai namar ka jingiakhih v) Ban kyntu ia ka Sorkar Jylla ban thaw lad ban ia kren bad baroh ki paidbah kynthup ki seng bhalang, lyngba ki jingiakren kiba khlem da buh kyndon. Ia katei ka kynhun la lam khmat da u Bah John F Kharshiing, Chairman, The Grand Council of Chiefs of Meghalaya, Chairman, Ka Dorbar ki Khlieh Nongsynshar Ka Ri Hynniewtrep, Spokesperson, Federation of Khasi States.
Ha kaba iadei bad ka shithi na MHA, u Dr Mukul Sangma, Chief Minister, u la tyrwa ban pynlong da ka jingialang kaba kyrpang ban lum da u Bah HDR Lyngdoh, Minister, District Council Affairs, ha kaba yn ia kren janai halor kumno ban jubap sha ka Sorkar India halor ki kam kiba iadei bad ki Khlieh Nongsynshar.
U Dr Mukul Sangma, Chief Minister, halor ka jingujor jong ki 11 Hima kiba khap pud bad ka Assam, u la mynjur ba ka kam ka long kaba khia bad kaba hap ban ia shong pyrkhat sani bha, ha katei ka jingiakren la mih ka jing pynsngew halor ka jingeh kaba ia shem ki 11 Hima namar ba ha kawei ka liang ka Meghalaya Regulation of Land Transfer Act ka buh jingeh ia ki ban register bad ban lum ia ka khajna bai wai bai pynthymmai dulir ia ki bym dei Khasi na kito kiba la don dulir naduh ki por Assam bad ruh naduh ki por phareng, bad hashwa ban pynjari ia katei ka Ain, ki la pynpaw ba kitei ki briew kiba don sha khappud haba kim ioh lad ban register sha ka Hima ki leit ban register noh sha ka office u DC sha Assam. U Chief Minister u la mynjur ban ia kren ban pynlong ia ka Commission lane ka jingiakren kaba kyrpang halor kane ka phang kaba ktah ia u pud u sam jong ka jylla Meghalaya.
Ha kaba iadei bad ka khaii pateng sha ki thain Border India bad Bangla, u Chief Miinister u la ong ba ka Sorkar Meghalaya ka la lah ban pynsngew ha ka Sorkar India kaba la mynjur ban plie 20 tylli ki Border Hat ha shilynter u pud u sam jong ka Meghalaya -India – Bangladest Border. U la ong ba ka jingplie ia ki ar tylli ki iew border ki la sdang wanrah ia ka jingmyntoi ia ki nongrep namar mynta kiba bun ki mar jur kiba dei ki mar pyut ki la sdang ban iaid iew ha ka dor kaba kham heh ban ia kaba long mynshwa.
Ha kaba ia dei bad ka jingdawa ia ka ain ILP ba ka jinglong ka suk ka sain u Chief Minister u la ong ba ia kane ka kam la ia kren mynta la bun bun snem kumba saw phew snem mynta naduh u snem 1973. U Chief Minister u la pynpaw ia ki jingeh kiba ki Sorkar kiba rim bad kaba mynta kin shem halor katei ka Ain ILP.
U Chief Minister, u la ong ba ka Sorkar ka shim khia ban buddien ia kane ka kam bad dei ha ka jingialam jong ka Sorkar jong u ba la lah ban wanrah ia ka Directorate of Infiltration, bad da kaba rai ban thung haduh 39 ngut ki Labour Inspector ha baroh 39 tylli ki C&RD Block.
U Dr Mukul Sangma, Chief Minister u la pyntip sha ki Khlieh Nognsynshar ba ka Sorkar ka la pynkhreh ia ka Ain kaba thymmai ka ban iarap ha ka ban teh lakam ia ki nongwan rung kyrthei ki nongwei, bad ha katei ka ain thymmai u la ong ba kin tyrwa bad thaw ka lad ha kaba ki Dorbar Shnong kin iatrei lang bad ki tnad jong ka Sorkar kum shibynta ban ioh ka jingiatrei lang ryngkat hapdeng ki bor Enforcement, ki Pulit bad ki bor Shnong.
U la kyntu ia ki Khlieh Nongsynshar ban ia ai jingmut kumno ban pynjanai ia katei ka ain kaba ka Sorkar kan sa pyllait hashen sha ki paidbah khnang ba kin ioh ban ai jingmut. U la kyntu lyngba ki Khlieh Nongsynshar ban kyntu ia ki Seng Bhalang ba kin sangeh ia ki jingiakhih bad ban ia treilang ryngkat ban ioh ban ia teh ia ka jylla lyngba ki ain kiba lah ban pynjari bad kiba lah ban pyntreikam.
Ha kaba pynkut na ka liang ka kynhun ki Khlieh Nongsynshar ki la mynjur ban ia khmih bad peit ia kata ka ain kaba thymmai kaba ka Sorkar kan sa pyllait, bad kin sa ai ia la ki jingmut sha ka Sorkar ban nang pynjanai ia katei ka ain thymmai.
Ka kynhun ki Khlieh Nongsynshar ki kyntu jur ia ki Seng Bhalang ban wan shakhmat ban ia treilang khnang ban ioh ban khmih bniah ia katei ka ain thymmai kaba la pynkhreh na ka liang ka Sorkar. Ki pynpaw ba u Chief Minister u la kyntu lyngba jong ki sha ki seng bhalang ban wan shakhmat ban ia treilang ban ia phylliew jingmut lyngba katei ka ain kaban sa pynmih hashen.
Napdeng kito kiba la iadon bad kiba la ia kren ki long Lyngdoh Hima Lyngiong, Syiem Hima Mawsynram, Deputy Syiem of Hima Nongkhlaw, Sirdar of Hima Nongpoh, Myntri Kharlukhi, Myntri Kharbukhi of Hima Mylliem, Myntri Nongrum, Myntri Diengdoh, Hima Sohra, Secretary, Ka Synjuk Ki Khlieh Nongsynshar Hima Sohra, Secy Raid Ri 6 Kur, Hima Khyrim, Acting Chief Hima Nongspung, Secretary, Hima Nongspung, Secretary Hima Mawsynram, kynthup ki dkhot Executive Members jong ki Executive Dorbar ki Hima /Elaka bapher bapher.(SP News)
