Shillong, Rymphang 20: Ha ka jingialap election ha ka sngi iew Pynursla na ka bynta ki ar ngut ki kyrtong MDC u Bah Jan Tynsong, na ka Langkyrdem-Laitkroh bad ka u Bah Anthony Kongwang, na ka Nongkshen Constituency, u Bah John F Kharshiing, u la kyntu ai paidbah da kaba ai khublei ia ka Sorkar Congress namar ka la mynjur ban plie sa arphew tylli ki iew ha shilynter jong ki khap border Meghalaya – Bangladesh, u la ong ba kum uwei uba la pyrta bad buddien ia kane ka kam ka la khreh urlong mynta hadien ka jingpyrta kaba bun snem bad kan long ka jingkyrkhuh ia ki paidbah ka thain Ri War Mihngi border.
Ban pynsted ia kitei ki kam la donkam ban jop baroh arngut ki MDC khnang ba ka kti ka mon ka kti ka diang jong u bah Prestone Tynsong, MLA kane ka thain kin long kiba khlain ban wanrah ia ki jingkylla hapoh kane ka thain Ri War Mihngi baroh kawei
U la ai khublei kyrpang ia u Bah Pynshngainlang N Syiem, CEM bad nongialam jong ki MDC na ka Seng Congress bad ia u Bah Jan Tynsong, MDC bad EM kiba la trei shitom ban wanrah ia ka Act 2011 bad ki Rule 2013 na ka bynta ki nongaidawai (Traditional Healers ) kynbat kaban plie lad ia ki nongaidawai, ki nongkhem ba kin lah ban shim license na ka office District Council.
U la ong ba ka Sorkar ka dang pynkhreh ban pynbeit thymmai ia ka Sixth Schedule bad kano kano ka jingpynjanai kan myntoi lang sha baroh LAI tylli ki District Council namar ngi don ha ka juh ka jylla bad u la kyrpad ia ki paidbah ba kin buh ha ka jingduwai ban kynmaw ia ka Ri bad ki nongialam kiba la ialam bad btin ia kane ka Ri haduh kine ki sngi.
Haba phai sha kiwei ki seng riewlum, u la ong ba haduh kine ki sngi baroh ki para long MDC bad naduh ki seng UDP, HSPDP, bad KHNAM ki dang don hapoh ka jingialam jong ka kynhun KHUDA ba la ialam da ka Seng Congress hapoh Khasi Hills District Council, bad u pynpaw ka jingkmen ba ki don ka mynsyiem ban ia trei lang.
U la pynkynmaw ia ki kyntien jong u Bah BB Lyngdoh, CM barim jong ka jylla uba la juh ong teng ba ka Politics ka long ka iing kaba heh kaba bun kamra, kumjuh u la ong ba ka seng Congress ka dei ka iing kaba heh bad kaba bun kamra bad bun sien ki seng riewlum ki ia shong ia thiah lang ha kajuh ka iing, haduh kine ki sngi ka dang iaid ka juh ka tnum iing.
U la ong ba um pat ioh sngew haduh kine ki sngi ba ki seng riewlum ba kin ong ba kim treh ban ia ryngkat bad ka seng Congress – u la ong sakhi maphi ki paidbah kaei kaban sa jia hadien ka jingiathep vote ka jingia niew vote ha ka 27 tarik Feb 2014 ngin iohi ba kitei ki jingialap pyrshah Congress kin sa kylla madan lut bad baroh ki seng riewlum ki kylla kaba mut bad ki wan ban ia snoh kti lang bad ka Congress na ka bynta ka bit ka biang jong u paidbah ka jylla Meghalaya.
kumta, u la kyntu ia ki paidbah ban wan sha ka juh ka thong bad ban pynjop ia kitei ki ar ngut khnang ba kin lah ban ai ka jingshakri kaba kham bha ia ka thain Ri War Mihngi.
Kiwei kiba la ia kren ki long u Rangbah Shnong, Pynursla uba la pyniaid ia ka jingialang, u Bah RM Shabong, u Editor Rupang, bad ki kyrtong baroh ar ngut u Bah Jan Tynsong, MDC Langkyrdem-Laitlyngkot, bad bah Anthony Kongwang, uba dei ruh u nongrwai uba pawnam ha ka Ri Khasi.(SP News)
