Shillong,kyllalyngkot,08: Ka HANM-Women’s Wing mynta ka sngi ka la phah da ka dorkhas sha u Myntri Rangbah jong ka jylla, u Dr. Mukul Sangma, halor ka jingshah kem bad shah pynngat ha ka aiñ MPDA ia u President jong ka HANM-West Khasi Hills District, u Bah Arphul Kharbani.
Katkum ka dorkhas kaba la soi da ka President bad General Secretary jong ka HANM Women’s Wing, la ong ba ki bor pulit ki la ujor pyrshah ia ki ‘riew runar kiba la donkti ban thang bad pynjulor ia lai tylli ki ophis jong ki tnat treikam jong ka sorkar kiba don hapoh Nongstoiñ, kiba la jia ha ka 22 bad 23 tarik jong u Nailur 2013. Hynrei ym shym la kdew satia ia ki kyrteng jong ki briew, pynban la kem ia katto katne ngut ki samla halor ka jingkynnoh ba ki la donkti ban thang ia kitei ki ophis.
Ha ka dorkhas, ka seng, ka la kam ruh ba u Bah Arphul uba la shah kem halor kitei ki jingshah kynnoh um shym la don satia ha Nongstoiñ ha ka por ba jia kitei ki jingjia namar ba u la leit phah sumar sha nongbah Bangalore. Hynrei u la shah kem ynda u la wan phai na Banglore bad shah pynngat syndon ha ka kyndon aiñ MPDA naduh 29 tarik u Nailur 2013 bad ban set ruh ha along haduh 3 snem kynthih.
Ka HANM Women’s Wing ka la pynpaw ruh ba kiwei ki dkhot jong ka seng kiba la shah kem ka sorkar ka la pyllait jamin noh hynrei ia u Bah Arphul ym pat pyllait satia bad u dang shah pynngat ha ka MPDA.
“U Bah Arphul um shym la donkti satia ha kitei ki jingjia bad u long uba lui lui. Ym tang kata, u Bah Arphul um shym la don ha ka nongbah Nongstoiñ ha katei ka por bad ia kane la lah ban pynshisha lyngba ki kot ki sla ba phah sumar, ki tiket shong rel, ki kot ba sei pisa na ka Bank bad kiwei mkiwei de. Ka seng ka kwah ruh ban pynpaw ba kum ka sengbhalang kam don bynta eiei halor kitei ki kam ba la leh da ki ‘riew runar,” la pynpaw ha ka dorkhas.
Kumta halor kitei ki nongrim, ka seng (HANM Women’s Wing), ka kyntu ia u Myntri Rangbah ban weng noh ia ka jingpynngat ia u Bah Arphul Kharbani ha ka kyndon aiñ MPDA.(SP News)
