Tura, Jymmang 19: Ka sacred heart higher secondary school, Dalu mynta ka sngi kala pynlong ia ka jingduwai kaba kyrpang hapoh jong ka Ampati Parish ha kaba kane ka parish kala shah dawa san lak tyngka ha ka seng lehnoh A’chik National Liberation Army (ANLA).
Haba ia dei bad kane ka jingshah dawa ban pynpaw ia ka jingpyrshah ia kaei kaba ki lehnoh kila leh ha kaba kim shym la map shuh wat ia ki Balang na ka liang jong ki skul katholik la shai ka sngi kin khang baroh kiba don ha Garo Hills.
U principal jong kane ka skul Sacred Heart Higher secondary, u Phadar Rev Benny Joseph ha ka khubor kaba u la phah mynta ka sngi u la kyntu ia baroh ki seng lehnoh ha kane ka thain ba kin sangeh noh ka jingrah bor, ka jingdawa pisa bad ka jingpyniap ia ki riew paidbah.
Kane ka long ka jingleh rain ia ka Garo Hills baroh ka wei namar wat ki trai shnong mynta ki don ha ka jingshong syier ha kaba ia dei bad ka jingim ka jong ki kumba ka long mynta lada jia ei ei ia ki nongialam seng sain pyrthei baroh baroh ki ia hala hynrei haba jia ia ki riew paidbah la shu sngar jar jar.
La ong ba ki seng lehnoh la seng ia kin a ka bynta ban kamai pisa khlem da trei shitom bad ban kamai da kaba shu dawa na ki riew paidbah, la ong u phadar ba ki lehnoh ki dei ban burom ia ka jingim briew bad kumba ka long mynta na ka liang jong ka balang katholik ka ieng pyrshah ia ki kam lehnoh.(SP News)
