Shillong, Jan 02: Ka seng CSWO kala ai ka jingiaroh ia u nongiasaid jong ka Gigh Court u Bah V.G.Kynta ia kaei kaba u la kren ha kaba ia dei bad ka jingpynjlan shuh ia ka jingtrei kam jong u Bah WMS Pariat kum u Chief Secretary. Lada ka sorkar ka weng noh ia kane ka jingpynjlan kan ai ka jingshngian ia kiwei ki IAS officer kiba la dei ban poi sha katei ka kyrdan bad ia kiba dei ban ioh kiew kyrdan.
Kumba ka long mynta na ka liang jong ka seng Congress khamtam u Rahul Gandhi u kwah ban rat ia ki kam bamsap bad lada kane ka sorkar Congress ka kohnguh ia ka jingkren ka jong u ki la dei ban sngap katkatkum ka jingkren jong ki nongialam kane ka seng.
Ki don katto katne ki IAS ophisar haba iohi ia kane ka jingleh jong kane ka sorkar ka la pynduh jingkyrmen ia ki bad ka CSWO ka ong ba kane ka jingleh jong ka sorkar ka long ban tap eit miaw ki kam jaboh baroh bad ka jingpynkynriah kam ia ki ophisar ka dei ka jingleh jong ki politician.
Baroh ki tip ba ka sorkar ka iaid sha khmat lyngba ka jingdon jong ki rule ka sorkar kam lah ban leh kumne tang ban pynhun ia ki katto katne ngut ki briew. Ka CSWO ka ong ba ki department bapher bapher jong ka sorkar ki dei ban pynbeit ia ki jingbakla jong ki khnang ba ki kam kin iaid beit ym ban shah ba ki politician kin leh katba ki mon.(SP News)
