Shillong, Kyllalyngkot 28: Ka jingialang jong ki nongkitkam hapoh ka C&RD Block Mawryngkneng, kaba kynthup ia ki nongmihkhmat jong ki 81 tylli ki Village Employment Council (VEC) bad ki 36 tylli ki Area Employment Council (AEC) ba la pynbeit da ka Meghalaya State Planning Board(MSPB), ka la long mynne 28 tarik January 2014 ha office Block Mawryngkneng, ban ia kren halor ka MGNREGA.
Ha katei ka jingialang la don lang ki nongkitkam kum ki Chairman, Secretary, bad ki Longkmie(women’s representative), kiba la wan mih khmat na kumba 81 tylli ki Shnong na kylleng ka thain Mawryngkneng.
Ia ka jingiasyllok la plie da u Bah A. Mukhim, MCS, BDO, Mawryngkneng C&RD Block bad la aiti ban pyniaid da u Bah John F Kharshiing, Co-Chairman, Meghalaya State Planning Board, & Chairman, Grand Council of Chiefs of Meghalaya, ha ka jingiadon lang ki khadsan ngut ki Gram Sevaks, bad kiwei kiwei ki officer Sorkar.
Ha shwa ban sdang ka meeting u Co-Chairman, u la pynlong ka jingiasyllok kaba lyngkot bad u BDO bad ki khadsan ngut ki Gram Sevak bad kiwei kiwei ki officer jong ka Block ban iohsngew ia ki jingeh kiba ki shem ha ka jingtreikam ka jong ki. Ha katei ka jingiakren u Bah John F Kharshiing, Co-Chairman, MSPB, u la ai bun ki jingaijingmut ia ki khnang ba kin lah ban long ki nongiarap ia ki paidbah bad ia ka Sorkar ban lum thup ia ki jingtip kiba kongsan (kum ka khana samari) na ka bynta ka Sorkar. U la ai khublei ia u BDO bad ki Gram Sevak kiba la trei shitom ban peit khmih ba ki scheme Sorkar kin iaid ryntih sha ki paidbah.
Ha katei ka jingiasyllok paidbah la ai ia baroh ban ia kren mar 2 minute bad kiba bun ki la ioh ban ia shim bynta.
Hadien ka jingiatai kaba la neh jan lai kynta ka sur na kiba bun ka long kumne harum :- 1. ba ka scheme MGNREGA ka long ka scheme kaba la warah ia ki jingmyntoi bad ka la pynkylla dur bad kyntiew ia ka imlang sahlang ka jinglong jingman hapoh ki shnong. 2. ban kyrpad ia ka Sorkar Kmie ba ka dang dei ban pyniaid ia kane ka scheme MGNREGS 3. ba ka Sorkar Jylla kan thaw lad ban pyllait pisa ha ka por kaba biang 4. ban kyrpad ia ka Sorkar Jylla bad Sorkar Kmie ban pynkiew ia ka bai bylla sngi. 5. ban thaw lad ban pynpoi ia ki Bank sha ki jaka kyndong 6. ba ki bor District Council bad Sorkar Jylla ki dei ban thaw kyrkieh ia ki Ain Shnong kum shubynta ba ki nongpyniaid shnong kin ioh ia ka bai leit bai wan ka bai lut sngi. 7. ban kyrpad ia ka Sorkar Jylla ban thaw lad ban siew ia ka bai lut sngi ka bai kot sada jong ki nongkitkam VEC.
Na ka liang u Bah John F Kharshiing, Co-Chairman, Meghalaya State Planning Board, Working Group -3, u la pyntip ba ka State Planning Board kan dang iai leit sha ki katto kattne tylli ki C&RD Block ban ioh sngap markhmat ia ki jingaijingmut na ki Chairman, Secretary, Treasurer, Village Employment Council (VEC) bad Area Employment Council(AEC) bad u la kyntu ia ki ban phah lada don kino kino ia ki jingai jingmut kumno ban pynjanai bad nang kyntiew ia ki rukom treikam jong ki scheme C&RD, da ka jingthoh lyngba ki BDO jong ki lane ban phah beit sha u Bah John F Kharshiing, Co-Chairman, (mobile 9436102663 – office-9856022735). (SP News)
