Shillong, Naiwieng 29: Kyrpad ka Dorbar Ki Khlieh Nongsynshar ka Ri Hynniewtrep, ia u CEM, JHADC ban lum thup bad ban lum jingtip halor ki Seng Kur lane ki Dorbar Kur hapoh u pud u sam jong ka Jaintia Hills
Ka Dorbar Ki Khlieh Nongsynshar ka Ri Hynniewtrep, ia u Ma Madon Rymbai, CEM, JHADC ban lum ia baroh ki Seng Kur lane ki Dorbar Kur hapoh u pud u sam jong ka Jaintia Hills.
Ia katei ka jingkyrpad la buh da u Bah John F Kharshiing, Co-Chairman, Meghalaya State Planning Board; Chairman, Ka Dorbar Ki Khlieh Nongynshar Ka Ri Hynniewtrep; bad Chairman, Grand Council of Chiefs of Meghalaya; bad Adviser, Seng Kur Kharshiing, hakhmat u Ma Madon Rymbai, MDC, Chief Executive Member, JHADC, ha ka jingiakynduh por 11.30 baje mynstep hapoh office treikam District Council Jowai, ha ka 28 tarik November 2013.
Ha katei ka jingiakren na ka liang u Bah John F Kharshiing, Chairman, Ka Dorbar Ki Khlieh Nongsynshar, u la ong ba ka long kaba donkam kyrkieh ban wanrah ia ka jingtyrwa ban thaw ka ain na ka bynta ki Dorbar kur ne ki Seng Kur, kum ka nuksa kaban kyrteng ka JHADC Administration of ‘Clans’ (Seng Kur /Dorbar Kur) ’ Bill 2013, kum shibynta ban pynjanai bad ban iada ia ki Riti Dustur jong ki 3363 tylli ki jait Khasi Pnar, kiba mih na ki Seng Kur ne Dorbar Kur bad kiba don hapoh u pud u sam jong ka bri u Hynniewtrep.
U la pynpaw ba ha kane ka jylla ki kur ki don ka bynta kaba khraw, naduh ka synshar khaddar ha kaba ki mih na ki kur, lane ha kaba iadei bad ka khyndew kur, bad haduh ha kaba jied ia ki Nongmihkhmat kum ki Syiem, Lyngdoh, Dolloi, Myntri, Basan, Pator, bad kiwei kiwei. U la ong ruh ba ka long kaba kyrkieh ba ki bor JHADC ki la dei ban buh ia baroh ka jingtip shaphang ki jait kur Khasi Pnar, bad ban don ruh ia ka Riti Pyniaid kam jong kawei pa kawei ka kur, ki bor JHADC ki dei ban buh ruh ia ka kyrteng jong ki nongkit kam jong ki Kur baroh. U la pyntip ba ia kane ka kam na ka liang ka Dorbar ki la dep ia kren bad u CEM, KHADC uba la kular ban rah ia kane ka phang ha ka EC.
U Ma Madon Rymbai, CEM, JHADC, u la ai khublei ia u Bah John F Kharshiing, uba la wanrah sha ka JHADC ia kine ki kam kiba long kiba kongsan bha, bad u la ong ba un sa iakren bad ki officer jong ka JHADC ban ioh ban pyrkhat sani bha halor kane ka phang. U la mynjur ba ka por ka dawa ban don ki ain kiba kyrpang ban iada ia ki hok jong ki jaidbynriew rit paid lyngba ki ain. U la mynjur ba ia ki NOC Schedule Tribe Certificate la dei ban ai tang na District Council namar ka dei kaba peit, sumar bad synshar ia ki Riti ki Dustur.
Kiba la ia don lang ha katei ka jingiakynduh ki long u Ma H Lamin, MDC, JHADC, u Ma L Shylla, MDC, u Secretary, Seng Kur Lai Kpoh (Bareh, Paksang, Kassar), u President, Seng Kur Passah, bad kiwei kiwei ki Rangbah Kur na kiwei ki Seng Kur.(SP News)
