Shillong, Nohprah 14: Ka Assembly jong ka Dorbar Khlieh Nongsynshar Ka Ri Hynniewtrep, kaba kynthup ia ka Grand Council of Chiefs of Meghalaya; Federation of Khasi States, Dorbar ki Dolloi, bad ka Council of Nokmas, kaba la ia kynduh mynta ka sngi 14th December 2012, ha Shillong, hadien ka jingiatai kaba jan saw kynta la shim ia kine ki rai harum: –
Ban kyntu jur ia ka Sorkar India ban pynsted bad pynkloi ia ka jingpynbeit thymmai da kaba pynrung, bad ban pynpaw ha kaba shai ia ka jutang ki jingiateh bad ki jingkular (Instrument of Accession and Annexed Agreement) kiba la mynjur bad ia soi hapdeng ka Sorkar India bad ki arphew san Hima Khasi (Federation of Khasi States) ha ka 9th, 13th, 14th, August 1947 bad 17th August 1948.
Ban kyrpad ia u Syiem bad Dorbar Hima Khyrim ban pdiang ia ka jingtyrwa ban lum ia ka Emergent – Dorbar Ri (Peoples Parliament)
Ban ai bor ha u Chairman bad ki katto katne ngut ki Khlieh Nonsynshar ban iakren bad ki bor KHADC ban pynkhreh bad ban ia mir jingmut halor ka jingthmu ka Sorkar India bad Sorkar Jylla ban pynbeit thymmai ia ka Sixth Schedule.
Ban kyntu ia ka Sorkar Jylla ban mang kyrpang ia ka bhah na ka budget jong ka Sorkar Jylla sha ki 54 Hima /Elaka ha Khasi Hills, 19 Elaka ha Jaintia Hills bad na ka bynta ka Council of Nokmas kum shibynta ban kyrshan ban nang kyntiew ia ki iktiar jong ki ha ka ba ia dei bad ka synshar, khaddar, bad bishar ia ki Khun ki Hajar ha la ki Hima /Elaka.
Ban kyntu ia baroh ki seng sain pyrthei (political parties ) ha ka jylla Meghalaya bad ka Ri India ban kyrshan ia ka quota on Promotion Bill Dalit and ST reservation Promotion Bill
Ban kyrshan ia ka jingdawa jong ki seng bhalang ia ka Sorkar Jylla ban wanrah ia ka ain Lokayukta Bill kaba shai bad kaba khlain kum shibynta ban ai ia u paidbah ia ka synshar khaddar kaba khuid ba suba hapoh ka jylla Meghalaya.(SP News)
