Shillong,kyllalyngkot,24: Ki khyndai tylli ki shnong ha ka thain Umkiang ki ba kynthup naduh chymplong haduh Ratacherra East Jaintia Hills District, ki la ai ia ka jingkyrshan kaba pura ia ka jingkhot pakhang surok miet jong ka AJYWO, KSU, FKJGP bad ruh ka HNYF ha ka 27 bad ruh 28 tarik mynta u bnai ban pyrshah ia ka jinglong kuman jong ka sorkar halor ka jingdawa jong ki ban maramot ia u National Highway 44 namar ka jingsniew palat jong u kaba la ktah ia ka leit ka wan jong ki paidbah.
“Na ka liang jong ngi ki khyndai shnong, naduh Chymplong haduh Ratacherra, ngi kyrshan pura ia ka jingkhot pynlong jong ki saw seng-ka AJYWO, KSU, FKJGP bad ka HNYF ia ka pakhang surok miet ban pyrshah halor jong ka jingkuman jong ka sorkar sorkar ban maramot noh ia u NH 44 uba la sniew palat mynta” ong u Bah Silent Sutnga, U Chairman jong kitei ki 9 -Shnong ha u kyrwoh mynta ka sngi.
U Bah Silent Sutnga u ba dei ruh u Rangbah Shnong jong ka Shnong Umkiang u la ong shuh shuh, “Ka surok bah NH 44 khamtam naduh Sonapur haduh Malidor satang katno sngi eh kan dang long ban iaid kali. Ka por kan sa poi ha kaba kane ka surok kan sa pyndkut noh ia ka leit ka wan jong u paidbah jong ka jylla Meghalaya bad ruh ia ki paidbah nongleit nongwan na kiwei pat ki jylla jong ka jong ka North East India lyngba kane ka surok. Ngi sngewsih halor ka jingmatlah bad jong ka jingkyllut jong ka sorkar Meghalaya bad ruh ka sorkar India. Kane ka dei ka jingibein ia u paidbah nong leit nongwan”
“Ngi iaroh bad ruh sngewnguh ia ka AJYWO, KSU, FKJGP bad ka HNYF kaba la shim da kane ka sien jam jong ka jingiakhih ban pynbor ia ka sorkar ban maramot noh ia kane ka surok. Ngi na ka liang jong ki 9- Shnong, ngi ai ia ka jingkyrshan kaba pura ia ka jingiakhih jong kitei ki saw seng bad ngi dawa ruh na ka sorkar Meghalaya bad ka sorkar India ba kan maramot noh ia katei ka surok na ka bynta ka bha ka miat jong u paidbah bad ngi kyntu ruh ia ki paidbah bad ruh ia kiwei ki shnong na Jaintia Hills bad ruh wat ia ki paidbah na kiwei pat ki jylla jong ka thain Shatei Lam-Mihngi ba kin nang ai shuh shuh ia ka jingkyrshan ia ka AJYWO, KSU, FKJGP bad ruh ka HNYF khnang ba kane ka jingiakhih jong ki kan long kaba jop na ka bynta ka bha ka miat jong u paidbah” pynkut u bah Sutnga ha u kyrwoh ba u la phah sha u nongthoh khubor.(SP News)
