Nongpoh, K’Lyngkot 11: Ka don ka jingpyr-shah jur ia ka sorkar jylla lyngba ka tnad pulit ban pynkynriah kam noh ia ka Superintendent of Police, Ri Bhoi District ka Kong Claudia Lyngwa, na ka liang ki saw tylli ki seng-bhalang ba pawkhmat ka Ri Bhoi District kiba kynthup ia ka KSU, NKHD, FKJGP, NKHD, RBYF, Sengkmie bad ka HNYF, Sengkmie ki la rai ban pynlong da ka jingia-khih da kaba khot ia ka pakhang ophis kaba ar sngi kata naduh ka 14 bad 15 u K’Lyngkot ha baroh kawei ka Ri Bhoi District.
Ka daw jong ka jing-shah pynkynriah kam noh kum ka SP Ri Bhoi District sha ka 3rd Batallion Jowai, ka long hadien ba kam shim khia ban tohkit ia kawei ka truk kaba la tynrah ia kawei ka kali sorkar kaba dei jong kawei ka ADC jong u Lat. R.S Moshaharry.
U Samla Ferdynald Kharkamni, President ka KSU, NKHD kum u nong -pynlait khubor, u la ia-thuh, ba na ka liang ki saw sengbhalang kiba kynthup ia ka Ri Bhoi Youth Federation (RB-YF), Sengkmie, ka Hyn-niewtrep National Youth Front (HNYF), Sengkmie, ka Khasi Students Union (KSU) North Khasi Hills District bad ka Federation of Khasi Jaintia and Garo People (FKJGP) North Khasi Hills District mynta ka sngi ha ka jingialang kaba la pynlong kyrkieh ki la shim syndon da ka rai ban pynlong da ka jingiakhih da kaba khot ia ka pakhang ophis kaba ar sngi naduh ka 14 bad 15 tarik u K’lyngkot kum ka dak ban pyrshah jur ia ka jingshah pynkynriah kam noh ka SP, Ri Bhoi District.
Mynta pat kala buh ha ka jingeh ia ki sengbhalang ban kyntu ban pynsangeh ia ka jingpynkynriah kam namar ba ka Election Commission kala pynbna ia ka sngi thep Vote ba kan lo9ng ha ka 23 tarik u Rymphang 2013.
Na ka liang ki saw seng, ki la kyrpad jur ruh ia ki paidbah bad ki nongtreikam sorkar ba kin ai ka jingiatreilang ha kitei ki sngi pakhang ophis kum ka dak ban iasnohktilang bad ki sengbhalang bad ruh ban pyrshah ia ka sorkar jylla na ka bynta ka jingpynkynriah kam noh syndet ia kane ka SP na ka Distric khamtam ha ka khyllip mat ba khatduh.
Ha kawei pat ka liang, ka Nongpoh Region Auto Owners & Drivers Association (NRAO&DA) bad ka Lyntijam Welfare ruh ki la pynpaw ia ka jingpyrshah kaba jur halor ka jingshah pynkynriah kam ka Kong Claudia Lyngwa (SP) na kane ka Ri Bhoi District.
U Bah Marcus Marten, President ka NRAO&DA, u la ong, ba ka jingpynkynriah kam noh ia ka SP ka long ka bym shong nongrim haei haei. Na ka liang u Sumar Swer, President ka Lyntijam Welfare & Development u la iathuh, ba ka Association ka pynpaw ia ka jingsngewkhia kaba jur halor ka jingpynkynriah kam noh ia ka SP khlem khlem pat dei por.
La ioh jingtip ba ia ka Kong Claudia Lyngwa, la leh burom khatduh hynne ka janmiet hashwa ba kan leit ban shimti noh ia ka kam kum ka Commandant ka 3rd Battalion Khlieh Tyrshi, Jowai.
