Shillong, Naiwieng 29: Ki bor ba dei peit ia ka District Administration ha dien ba ki la pynshong nongrim ia ka jingpan jingbit jong ki seng bhalang ban pynlong ia ka jingialang paidbah ha Madan student ha pdeng ki kyndon kiba la buh ba ki hap ban but.
Ha kane ka jingbit kaba la ai ban pynlong ia ka jingialang paidbah na ka liang jong ki bor ba dei peit ia ka District Adminstration ka la kren ba ka la don ka jingiakren halor ka phang kaba ia dei bad ka hok ha ka synshar paidbah jong ki seng bhalang ba ki don ia ka hok ba kin pynlong ia ka jingialang paidbah.
Ha dien ba la bishar bniah ia kane ka jingpan jingbit la sngewdei ban burom ia kaei kaba ki pan, hynrei ban pynlong ia ka jingialang kaba suk jai jia ka shong ha ki seng kiba khot ia kane ka jingialang paidbah ban peit ba kan nym don kano kano ka jingklumar.
Ha dien ba la peit bniah bad la pan ia ka jingai jingmud na ka liang jong ki pulit ruh, la sngew dei ba dei ban ai ia ka jingbit ia ki seng bhalang ba kin pynlong ia kane ka jingialang paidbah la shai ka sngi ha Madan student bad ka por ka dei ban long naduh ka por 11 baje mynstep haduh ka por 3 baje noh phai sngi.
Kiba pynlong ia kane ka jingialang paidbah ki dei ban but ia ka rai jong ka iing bisahr kaba ha khlieh duh jong ka Ri India ha kaba pyndon kam ia ki tyndong jingpynsaw. Na ka liang jong ki bor ba dei peit ia ka District Administration ki la buh shibun ki kyndon.
Ki kynhun kiba khot ia ka jingialang ki dei ban pynthikna ba ki briew kiba poi sha kane ka jingialang kim dei ban rah ia ki tiar pynmynsaw kiba lah ban wanrah ia kano kano ka jingjia kaba sngewsih bad pynthud ia ka shong suk shong sain.
Lada don kano ka jingjia kaba lah ban mih ha shuwa ka jingialang lane ha dien ka jingialang kaban wanrah ia ka huri hura ka ban pynthud ia ka jingshong suk shongsain ka dei ban logn ka jingkit khlieh ka jong kito kiba khot ia kane ka jingialang paidbah bad ki shan pynshitom kat kum ka ain.
Ki nongkren ha kane ka jingialang paidbah kim dei ban kren kano kano kaba lah ban wanrah ia ka jingpynshit ha ki paidbah kaban long kum ka jingpynshit ne kynshoit ia ki kaba lah ban wanrah ia ka jingthud ha ka shong suk shong sain.
Ki nongkhot ia kane ka jingialang paidbah ki dei ban pynthikna ba kan nym don kano kano ka jingpynthud ia ka leit ka wan jong ki paidbah ia ki kali bad ia ki khynnah skul bad ki samla pule ha ki college.
Ki nongkhot ia ka jingialang ki dei ban buh shibun ki nongkit kam ban peit ba kan nym don kano kano ka jingjia ha ka por ba ka don ka jingialang paidbah, ki dei ban pynthikna ba ki paidbah ki dei ban ia leit la ka lynti lynti da kaba jai jai ha dien ka jingialang paidbah khlem da iaid paidbah
Na ka bynta ka jingieng jong ki kali ki dei ban pyntip sha ki pulit pyniaid kali lada don kam ia ka jingiarap ka jong ki . La bidaong tyngeh ba ym bit ban pynlong ia ka jingiaid paidbah ha ka por ba sdang lane ha ka por ba kut ka jingialang.
Lada pynkhein ia kine ki kyndon kiba la buh ki bor ba dei peit ki lah ban wengnoh ia kane ka jingai jingbit ki nongialam jong kine ki sengbhalang kiba pan ia kane ka jingbit ki hap ban shim ia ka jingkit khlieh. (SP News)
