Shillong, Kyllalyngkot, 25: U Bah A.L Hek, MLA ka Pynthorumkhrah u ba long ruh u Myntri ka tnat ka Koit ka Khiah ka sorkar jylla u la buh ia u mawnongrim ban tei ia ka Youth Cultural Centre ha ka shnong Mawpat, ha kane ka sngi la don lang ruh u Sanjay Goyal, Deputy Commissioner ka East Khasi Hills District, ki dkhot ka Dorbar Shnong Mawpat bad ki paidbah nongshong shnong.
U Bah K.Ryntathiang, Rangbah Shnong ka Mawpat, u la iathuh ba ka Dorbar Shnong ka la phah ia ka jingtyrwa sha ka Sorkar ban tei ia kane ka Centre ha ka 28 tarik, oct, 2013 bad tang hapoh khyndiat bnai la mang ia ka skhim bad ka jingtrei ka la sdang shaid shaid.
Ia ka jingtei ia kane ka Centre la ai jingiarap da ka District Rural Development Agency (DRDA), East Khasi Hills bad la mang pisa T. 9, 94, 360 lak na ka Grant. Kane ka jaka kan don kawei ka Hall bad ar tylli ki kamra treikam. Ia kane ka Centre la khmihlynti ban pyndep noh hapoh 5 bnai ei ei.
U Bah Hek haba kren ha kane ka sngi ula ong ba kane ka Youth Cultural Centre kan long ka rynsan ka ban plie ia ka sap ka phong ki samla ha kane ka thain ha kaba yn sa pynlong ki prokram bapher bapher. U ong ba kum kine ki Youth Cultural Centre la tei da ka Sorkar ha baroh ki Block na ka bynta ban kyntiew ia ka sap ka phong ki samla bad kumjuh ruh ban plie lad plie lynti ia ki ha ki rynsan bapher bapher. Ha kajuh ka por u la khot la wer bad kyntu ia ki nongshong shnong ba kin sumar ia kane ka ing kum ia ka nongkynti lajong.
U Sanjay Goyal haba kren ha kane ka sngi u la ong ba kane ka ing kan long ka sakhi ia ka Sorkar kaba angnud ban kyntiew ia ka sap ka phong ki samla. U la ong ba kane ka ing kan plie lad plie lynti ruh ia ki samla ha kiba bun ki prokram ba kin sa pynlong nangne shakhmat. (SP News Agency)
