Shillong, nailur 2: ka jingialang kaba la khot da ka sorkar ban pynlong ia ka All Party Meeting la shai ka sngi la pynsangeh noh na ka daw jong ka jingkyrpad jong ka seng UDP bad ia kane la pdiang da u myntri rangbah ka jylla u Dr Mukul Sangma bad ia ka jingialang la buh ban long noh ha ka 5 tarik mynta u bnai.
U Nongialam ka liang pyrshah u Dr Donkupar Roy u la ong ba mynta ka sngi ki la phah ia ka jingtip sha u myntri rangbah ka jylla ba ki dang ioh pdiang ia kane ka jingkhot dang ar sngi bad kim pat loh ban Ia kren hapoh ka party.
U Dr Don u la ong ba u kwah ban pynshai ba ka jingkhot ban iakren ka long halor ka jingwantuid jong ki mynder ri (Influx) kam dei ka ILP. Kane ka jingiakynduh kan long halor ka Influx. Na ka daw ba ka don kane ka pakhang shnong ka la buh ia ki ha ka jingeh ban ia kren shuwa ba kin leit ia kynduh ia ka sorkar.
Na ka liang jong u myntri rangbah u Dr Mukul Sangma u la ong ba u la ioh pdiang ia kane ka jingkyrpad jong ka UDP bad u la pdiang bad la buh sngi ba kin ia kynduh ha ka 5 tarik mynta u bnai.(SP News)
