Shillong, Jymmang 08: Ki ar ngut ki dkhot jong ka Khasi Student Union (KSU) u samla Teiborlang Nongbri bad u samla Johny Lyngdoh kiba la shah kem ha ki pulit halor ka jingkynnoh ba ki don kti ha kaba pynklumar ha Laitumkhrah ha ka sngi kyrsiew kaba la khot da ka seng la pynlait noh mynta ka sngi da ka iing bishar da kaba shu bah jamin.
Ha kine ki sngi na ka liang jong ka KSU ka la dawa na ka sorkar ba ka dei ban pynlait noh ia kine ki ar ngut ki dkhot jong ka seng khlem kano kano ka jingteh kyndon ia kaba la pyrsha jur sa ki pulit jong ka jylla Meghalaya.
Na ka liang jong u Superintendent ki pulit jong ka East Khasi Hills u Bah M Kharkrang u la pynthikna ba ia ki ar ngut ki dkhot jong ka KSU la pynlait da ka iing bishar ba don burom mynta ka sngi ha dien ba la don kiba wan bah jamin.(SP News)
