Mawngap Kyllalyngkot 15: Ka jingialang jingpynkhreh ia ka Dorbar Ri kaba kyrpang kaba saw jong ki Nongsynshar Shnong, Hima jong ki Hima Marbisu, Mawphlang, Nongspung, Lyngiong, Nonglwai, Sohiong, ka la long mynta ka sngi ha Market Complex Mawngap, ha ka por 11 baje mynstep, ha ka 15 tarik 2013, ban ia kren halor ka jingpynkhreh ia ka Dorbar Ri kaba Kyrpang kaban long ha ka 13 tarik February 2013 ha Mairang, ha khmat Iing office Syiem Hima Nongkhlaw. 
Ia katei ka Dorbar ha Mawngap la pyniaid da u Bah NK Lyngdoh, Lyngdoh Hima Mawphlang, ha ka jingiadon lang ki Myntri, Lyngdoh, Sirdar, Secy Hima, ki Rangbah Shnong, ki Sordar bad ki Riew Rangbah na katei ka thain, ha ka jingiadon lang u Bah John F Kharshiing, Co-Chairman, MIDC, Govt of Meghalaya, Chairman, Grand Council of Chiefs of Meghalaya, & Spokesperson, Federation of Khasi States bad u Bah Harlinjai Skhemlon, Sirdar Hima Mawdon, & Secretary, Federation of Khasi States
Hadien ba la ioh ia ki jingpynshai katei ka jingialang ka la pdiang sngewbha ban shim khia ban pynkhreh ba iawer ia ki Dorbar Kur, ki Dorbar Shnong, bad ki Seng Bhalang bad ki paidbah na ki shnong ban ia mih paidbah sha katei ka Dorbar Ri kaba Kyrpang ha ka 13 February 2013 ba kan long kaba rah ia ka burom bad ka nam jong ka jaidbyriew baroh kawei.
Na ka liang u Bah John F Kharshiing, Chairman, Grand Council of Chiefs of Meghalaya, & Spokesperson, Federation of Khasi States, ha kaba kren hakhmat kane ki Rangbah Shnong, ki Sirdar bad Lyngdoh, Hima u la pynpaw ia ka jingsngewnguh ia U Paiem Phrester Manik Syiemlieh, bad ka Dorbar Syiem Hima Nongkhlaw kiba la pdiang ban lum bad ban khot ia ka Dorbar Ri kaba kyrpang bad kaba saw. U Bah John F Kharshiing, u la ong ba ka long kaba donkam bha kum ha kane ka por ban lum ia ka Dorbar Ri ban bteng ia ki rai jong ka Dorbar Ri kaba nongkong 14 Jan 2004, kaba ar 6 October 2007 bad kaba lai 14 November 2011.
U la ong ba ka long kaba donkam ban pynsngew hakhmat ka Dorbar Ri kaba Kyrpang bad kaba Saw( Special Peoples Parliament) bad ki khun ki hajar ia u soh bad ka jingjop jong ka jinglum Dorbar Ri lai sien ha kaba ka long ka sien kaba nyngkong hadien 64 snem ha kaba ka bor jong ka Constitution Ri India katkum ka Article 338 ka National Commission for Schedule Tribes(NCST) kaba la ai ia ka rai bishar kaba pynkysan ia ki dulir Instrument of Accession and Annexed Agreement 17 August 1948, ha ka 26 April 2012, kaba la bthah (direct) ia ka tnad Union Ministry for Tribal Affairs, Sorkar India ban leh ia kaba donkam ban pyndep ia kitei ki jingkular kiba la mynjur da ka Sorkar India bad ki Hima Khasi States. Nalor katei la don ruh ki kam kiba la nang mih kiba long kiba pynksan ia ki jingialeh bad ka jingdawa jong ka Dorbar Ri .
Ha kane ka Dorbar u Bah John F Kharshiing, Chairman, Ka Dorbar Ki Khlieh Nongsynshar Ka Ri Hynniewtrep, u la pyntip ba ka Dorbar ka la pynkhreh ia ki jingialang bapher bapher kum ka jingpynkhreh ia ka Dorbar Ri bad u la ong ba ka Dorbar ki Nongsynshar kynthup ki Rangbah na ki Shnong, bad ki Hima ka thain Sohra, Shella, Sohbar, Mawlong, Satsohpen, Laitkyngkot, bad kiwei kin ia kynduh lang ha ka por 11 baje mynstep ha ka 19 tarik January, 2013 ha office Syiem Sohra; Ki Sordar bad ki Rangbah ka Hima Nongkhlaw baroh kin ia kynduh ha ka por 10 baje myntep ha 21 tarik January 2013, ha Mairang, Office Syiem Nongkhlaw; katba ki Sordar bad ki Rangbah, ki Hima Nongstoin, Rambrai, Nobosohphoh, Mariaw, Mawiang, Jyrngam, Nonglang, Riangsih, bad kiwei kan long por 11 baje mynstep 22 tarik January 2013 ha Office Syiem Nongstoin, ki Khadphra(18) Elaka Dolloi bad Sirdar sha Ri Lum Jaintia Hills kin ia kynduh lang ha ka por 11 baje mynstep ha ka 25 tarik January 2013, ha Hall Tpep Pale Locality, Jowai, bad la kyrpad jur ia bador ban shim khia ban por ban ioh ka jingpynshai ha kaba iadei bad ka jingdonkam ban poi ryntih lang baroh sha ka Dorbar Ri ha Mairang ha ka 13 February 2013 naduh por 10 baje mynstep. U la pyntip ba ha kine ki khydiat sngi yn dang bteng ki jingpynba sha kiwei ki Hima / Elaka.
Kiba la ia don lang ha katei ka jingialang bad kiba la ai jingkren ki long u Lyngdoh Hima Mawphlang, Sirdar Hima Mawdon, Lyngdoh Hima Lyngiong, u Sirdar Hima Pansanngut, u Acting Chief Hima Nongspung, u Secretary Hima Marbisu, u Myntri Kharshiing, Hima Mawphlang, u Bah David Kharsati, Ex-MDC, bad bun ngut ki Rangbah Shnong bad ki dkhot Committee Shnong jong ki shnong bapher bapher.(SP News)
