Shillong, Naitung 04: Ia ka jinghiklai kaba ar sngi lynter na ka bynta ki nongthoh khubor jong ka jylla Meghalaya, ha kaba ia dei bad ka rukom thoh khubor ha kaba ia dei bad ka jingshong dorbar jong ka Assembly ne ka parliament jong ka Ri India la sdang mynta ka sngi.
Ia kane ka jinghikai la ai da ka Bureau of Parliament studies and training jong ka Lok Sabha Secretariat. Kane ka jinghikai ka long ban pynsngewthuh ia ki nongthoh khubor kumno ka Assembly ka trei kam bad kaei ka kam jong ki nongmih khmat kaba ki leh hapoh ka iing dorbar.
Haba plie ia kane ka jinghikai kaba ar sngi u speaker jong ka Meghalaya Legislative Assembly u A T Mandal u la ong ba kane ka dei ka lad na ka bynta ki nongthoh khubor jong kane ka jylla ban tip ia ka rukom trei kam jong ka iing dorbar bad kumno ban thoh ia kaei kaba jia hapoh ka iing dorbar.
Ha ka jingkren jong u Raashid Alvi Honoray adviser jong ka BPST, u la ong ba ki nongthoh khubor ki long hapdeng ka iing dorbar thawain bad ki paidbah namar dei lyngba jong ki lad pathai khubor ki paidbah ki tip ia kaei kaba u nongmih khmat jong ki u leh hapoh iing dorbar.(SP News)
