Shillong, Nailar 22: Ka president jong ka West Khasi Hills District Congress Committee (DCC) ka kong Eureka P Lyngdoh ka la iathuh ba ia ka Mawthadraishan Block Congress Committee(MBCC) la pyndam noh ha ka 12 tarik mynta u bnai.
Haba kren ha u SP news Agency, ka kong Lyngdoh ka la ong ba ka jingpyndam noh ia ka MBCC ka long kum shibynta na ka bynta ban pynbeit thymmai ia ka party ha katei ka jaka namar shuwa ka election MLA ki la don ki nongtrei jong ka ki la ia mih bad ha dien ba la kut ka election ki la ia wan biang.
Khnang ban ailad ia baroh ba kin ia ioh bynta lang ha ka jingpynkhlain ia ka seng na ka liang jong ka DCC jong ka West Khasi Hills ka la shim ia ka rai ban pyndam noh ia ka MBCC kaba rim bad shen yn sa pynlong ia ka election ban jied ia kiba thymmai ha kaba baroh kin ioh bynta lang ha ki kam party.
Haba jubab ia ki jingkylli ka kong Lyngdoh ka la ong ba ka kong Irin Lyngdoh ka MDC jong ka Pariong constituency ka la wan phai biang sha ka seng Congress bad ia ka la pdiang da ka seng. Na ka liang jong ka kong Lyngdoh ka la kyntait ia ka jingong ba ka don ka jingiapher jingmud hapoh ka party ha katei ka Block.(SP News)
