Jowai, Kyllalyngkot 01: Ka jingrakhe ia ka jingdap 151 snem jong ka sngi iap u Kiang nongbah u nongialeh lait luid la pynlong ha Jowai ha ka 30 tarik u Nohprah ia kaba la pynlong ia ka jingrakhe da ka Jaiñtia Ïasiat Khnam Kiang Nangbah Memorial Society (JIKKNMS).
Ha katei ka sngi la pynlong ia ka jingiamareh marathon, Slow Bike Racing bad ka jingiakop ia siat khnam, ia ki nongjop la ai da ka khusnam da ka pisa naduh shihajar haduh sanhajar ia kane ka jingleh burom la pynlong ha madan syntuksiar ia kaba la tip ruh kum ka madan kmai blai harud jong ka wah mih myntdu.
Haba kren kum u kongsan ha kane ka sngi u Deputy Chief minister u Dr RC Laloo u la ai ia ka jingiaroh ia katei ka seng kaba la pynlong ia kane ka jingleh burom ia u tei u khla kawait jong ka jaidbynriew pnar.
Kiwei ki nongialam kiba la don lang ha kane ka sngi ki long u MP jong ka Lok Sabha u Bah Vincent H Pala, u Bah Rubinus Sungkon MLA lem bad kiwei kiwei ki nongkit kam shnong.
Baroh ki nongkren ha kane ka sngi ki la pynpaw ia ka jingsngew ka jong ki ban ong ba u tei u khla ka wait ka stieh jong ka jaidbynriew bad u long shisha u nongialeh lait luid ban lait na ka jingshah the mraw ha ki dohlieh ha katei ka por.(SP News)
