Shillong Nohprah 20: Ban ialeh ban pynkhie im ia ka jingialehkai Hockey ha kane ka jylla kaba long ka National Game jong ka ri India, ka Meghalaya State Hockey Association (MSHA) kala pynlong ia ka Winter Hockey Coaching Camp ha Madan Iewrynghep, Laitumkhrah bad ia kane ka jingaijinghikai la pynhap pyrda noh
hynne ka sngi.
Ia kane ka Hockey Camp la sdang naduh ka 12 tarik mynta u bnai haduh ka 20 tarik, ha kaba palat 20 tam ki khynnah kynthei, ki khynnah rit shynrang 40 ngut bad kiba la heh palat kila poi 80 ngut na kylleng ki shnong jong kane ka nongbah kila wan ban ioh jinghikai na ki samla kiba ialehkai ia ka Hockey ha ki snem kiba la leit.
Ha kane ka sngi kut la sam ia ki Certificate sha kine baroh kiba la wan iashimbynta ha kane ka Coaching Camp da u bah Budraplang Nongrum, Assistant Engineer, Urban Dept ryngkat ka jingia donlang ki dkhot ka MSHA bad kiwei kiwei kiba la shah khot sngewbha.
Ka Hockey kadei ka jingialehkai kaba la pawbha ha kane ka jylla bad bun ngut ki rangialehkai ha ki snem kiba la leit noh kila mihkhmat na ka jylla Assam ban ia aireng ha ki lympung bapher bapher, hynrei haba ym don ka jaka ialehkai ne ka hockey field kane ka jingialehkai kala sdang ban duhjait noh ha kane ka jylla. Kumta ban pynkhie im biang sa shisien ia kane ka jingialehkai ka MSHA kala lumlang ia baroh ki nongialehkai kiba rim bad kine kila ai jinghikai ia ki khynnah kiba kwah ban nang ialehkai hockey.
Caption: Ki khynnah kynthei ki dang ialahekai ia ka Hockey ha , Laitumkhrah bad u bah Budraplang Nongrum u dang aiti ia ka Certificate.(SP News)
