Shillong,Nohprah,18: Ki paidbah ba wan ha Sa-i-maka Park ha Sohra kila ioh ban sakhi ia ka rukom shad 
kolshor kaba khampher na shnong Sohkynduh kaba hap ha Hima Sohra. Hynne ka sngi kaba dei ka sngi iap
jong u Myllung ba khraw ka ri u SosoTham, la pyni ia ka shad kiew iingthymmai jong ka shnong Sohkynduh ha ka Cherrepunjee Festival. Ia kane ka tamasa ka Sohra la pynlong da ka ophis jong u SDO (Civil) Sohra banpyni nam bad ban pynriewspah ia ka kolshor bad ka spah ba ka thain ka
don.
Haba kren ha kane ka sngi kum u kongsan u Bah Kenedy Khyriem u la ong ka shnong sohra ka long ka shnong kaba don nam khamtam ha ki kam jngohkai pyrthei bad u la ong ba ia ka nam jong ka sohra la tip na ka ktien ka thyllieh, ka akor ka burom bad ka riam ka beit, kum juh ia ka rukom bam rukom dih.
U SDO (civil) Bah CVD Diengdoh u la ong ba ka daw ba pynlong ia kane ka tamasa Cherrapunjee Festival 2013 ka long ban kyntiew ia ki jait jingbam ba pynmih na ka thain, ki soh ki pai, khamtam u sohniamtra na Mawphu bad Nongsteng, ka jingbam tynrai na thain Khadar Shnong, bad kawei ka long ban kyntiew ia ka Sohra kum ka nongmuna kaba u David Scott u la wan ban sah bad bun ki tiar ba la sahnam haduh mynta. Kine ki long ban kyntiew ia ka kam jngohkai pyrthei, ia ka ioh ka kot bad ka kolshor jong ka thain, la ong u bah Diengdoh.“Ia kine baroh dei ki paidbah ban long kiban don bynta na ka bynta ka jingmyntoi jongki hi”,
Ha kane ka tamasa la iohi ruh ia ka jingshad kynjoh skain na ka shnong Sohkynduh, ka la don ruh ka jingiakop bamsoh, ka jingiakop niah saikil, iakop phawar, iakop pule poitri,ialehkai point, bad ka jingiasiat khnam bad iasum khnam bad kiwei.
Ym tang kine, kala don ka jingpyni bad die ruh ia ki tiar bad ki jingbam bala shna bad shet hi da ki briew na ka thain Sohra, kum ki wain, kayiad um, ki jingshna kti, bad kiwei. U sohniamtra na thain Mawphu, na Nongsteng ba la wanrah ha kane ka tamasa. Ki sohniamtra ba thiang tam dei na kitei ka thain
Kiwei kiba la ia don lang ha kane ka sngi ki long u MLA jong kane ka thain u bah Titus Chyne, u Chairman jong ka MTDC u Bah David Nongrum. Ha ka jingkren ka jong ki baroh ar ngut kine ki MLA ki la kren kumno ban kyntiew ia ki kam jngohkai pyrthei ba kan long kawei na ki lad kamai ia ki paidbah.(SP News)
