Shillong, Risaw 07: U myntri ba dei peit ia ka tand sam bor ding ha ka jylla u Clement R Marak haba jubab ia ka jingkylli haba ka iing dorbar u la ong ba ka sorkar ka la shum ia ki lad ki lynti baroh ban pynioh bor ding sha ki nongkyndong lyngba ka skhim Rajiv Gandhi Grammen Vidyutikaran Yojna (RGGVY).
Haba batai shai ia kane ka skhim u myntri u la ong ba hapoh jong ka RGGVY ka jylla ka la pyntreikam ha ki san tylli ki District ha ka plan san snem kaba shiphew bad ia kane yn bteng biang ha kane ka plan sa snem kaba khatwei.
Ka jignmang pisa na ka bynta kane ka kam ka long haduh T.466.92 klur ban pynioh bor ding ia ki 1866 tylli ki shnong ha ki nongkyndong. Na kane ka skhim yn pynioh ia ka bor ding elektrik sha ki long iing kiba duk kiba la don haduh 1,09,696 ha kane ka jylla.
Haduh u Nailur jong mynta u snem la lah ban pynioh bor ding sha ki 11676 tylli ki shnong ha ka jylla bad kumba ka long mynta la lah ban pynioh ia ka bor ding kumba 75 haduh 80 persent ki shong.
Ia ki jingtrei hapoh ka East Khasi Hills la lah ban pyndep baroh bad la dep ban phah sha ka REC bad ia ki jingtrei ha Jaintia Hills bad Ri Bhoi District ruh la lah ban pyndep.
Haba ia dei bad ka Garo Hills na ka liang jong u myntri u la ong ba ia ki shnong kiba la ioh ding mynshuwa hynrei la duh noh mynta la lah ban pynioh biang kumba 74% bad ka sorkar ka don ia ka thong ban pyndep ia ki ha u bnai kyllalyngkot 2014, la ong u myntri.(SP News)
