New Delhi, Rymphang 06: Ka tand pynroi nongkyndong jong ka sorkar pdeng kaba pyntrei kam ia ka skhim Indira Gandhi National Old Age Pension Scheme (IGNOAPS) ha kaba ka sorkar pdeng ka siew ia kabai bam tynmen T.200 tyngka shibnai ia kiba la kot sha ka 60 snem ka rta bad T.500 tyngka ia kiba la palat ia ka 80 snem.
Ka sorkar pdeng kala kyprad ia ki sorkar jylla ruh ba kin thep lang ia ka bhah jong ki kaba mar kum juh na ka jingmih ka jong ki jylla. Ban pyntrei kam ia kane la dep ban thaw ia ka committee kaba kyrpang ban peit ia kane ka kam hapoh ka planning Commission.
Kane ka committee kaba kyrpang kan peit ia ka jingsiew ia kabai bam jong ki tynmen bad ia kiwei kiwei ki jingioh bad ia kane ka kaiphot kin ai sha ka sorkar ban peit bniah.
Kane ka long katkum ka jingjubab da u myntri khynnah ba dei peit ia ka hok jong ki paidbah u Manikrao Hodlya Gavit da ka jingthoh hapoh Rajya Sabha mynta ka sngi.(SP News)
