Shillong Jymmang 10: Hadien ba ki rangialehkai Hockey ka jylla Meghalaya kila wanphai da kaba wanrah ia ka nam bad burom ia ka jylla da kaba ioh ia ka takma rupa n
e silver medal ha ka 27th North East Games kaba la long ha Manipur ha u bnai bala dep, hynne ka sngi ka Meghalaya State Hockey Association(MSHA) kala pynkup burom ia kine ki rang ialehkai ha ka jingialang kaba la long ha Don Bosco Youth Centre.
Ka Myntri ka tnad Urban Affairs ka kong Ampareen Lyngdoh kaba dei ruh ka President jong ka MSHA haba kren ha ka jingpynkup burom, kala iaroh ia kine ki nongialehkai kiba la ialehkai met bad mynsiem ban wanrah nam bad burom ia ka jylla da kaba ioh ia ka takma rupa.
Ka kongsan kala pynpaw ruh ia ka jingsngewnguh ia ka tnad Sports and Youth Affairs jong ka jylla kaba la don ia ka jingshaniah ha kaban phah ia kane ka kynhun ban mihkhmat ia ka jylla ha ka North East Games, watla ha ki snem kiba la leit ka kynhun ialehkai Hockey kam shym la lah ban wanrah nam bad burom ia ka jylla.
Shuh shuh kala ong ruh ba ka MSHA kan trei borbah ban kyntiew ia ka jingialehkai Hockey ha kane ka jylla bad ban pynioh ia ka jingdonkam jong ki nongialehkai khnang ba kin lah shuh shuh ban kiew shaphrang ha kane ka jingialehkai bad kala iathuh ruh ba ia kane ka jingialehkai la sdang ban ialehkai man la ka sngi ha ki 4 tylli ki bynta jong ka nongbah Shillong kiba kynthup ia ka Laitumkhrah,Umpling,Jaiaw Students Field bad Pynthorumkhrah ha kaba la ai jinghikai ia ki khynnah ban pyntbit ialade ha ka jingialehkai Hockey.
Na ka liang u Director ka Sport and Youth Affairs u bah FM Dopth ula iaroh ia ki dkhot jong ka MSHA kiba la shimkhia ha kaban pynkhie im biang ia kane ka jingialehkai bad ban kyntiew ia kane ka jingialehkai ha kane ka jylla.
Ha kane ka sngi ka kong Ampareen bad u bah Dopth kila aiti ia ki jingai sngewbha bad ki momento sha ki rangialehkai kiba la wanrah nam bad burom bad ki rangialehkai Hockey kila aiti noh ia ka trophy kaba kila ioh na Manipur ha u bah FM Dopth.
Ha ka jingiakhun ha ka 27th North East Games ka Meghalaya kala ioh ia ka takma rupa hadien ba kala shah pynliem noh ha ka Manipur ha ka final da 2-3 kol ha ka jingiakhun kaba la long ha Khuman Lampak Main Stadiud, Imphal ha ka 11 tarik u Iaiong 2013.(SP News)
