Shillong, Jylliew 17: Ka Employment Regeneration Committee (ERC) jong ka Synjuk Seng S
amla Shnong (SSSS) ka pyntip sha kito baroh ki khynnah samla kiba la aplai kam na ka bynta ka Post Engineering Assistant jong ka All India Radio bad Doordarshan ba ka sngi ban long interview la pynkynriah noh sha ka 21 tarik u ‘naitung (July) 2013.
Ia kane ka jingtip la ioh na ka ophis treikam jong ka Staff Selection Commission North Eastern Region (SSC NER), Guwahati. Ia ki admit card la dep phah da ka SSC NER sha baroh kiba aplai kam hynrei lada jia ba ki kandidet kim ioh ia ka admit card ki lah ban download na ka sscner website. Kum ban shu pynkynmaw hangne, ka ERC – SSSS ha ka jingiatreilang bad ka Association of Radio & Television Engineering Employees (ARTEE) Meghalaya State Committee ryngkat bad ka Synjuk Samla Mawlai Iewrynghep ka la ioh ka lad ban pynlong ia ka Career Guidance & Counselling Programme cum Coaching Class na ka bynta palat 100 ngut ki samla pule na kylleng ka Ri Khasi Jaintia kiba la pass ha ka lain engineering, science bad technology.
Ha ka Coaching Class kaba la pynlong ha skul Mawkhar Christian, ki samla pule ki la ioh ka lad ban pyntbit ialade ban ialeh ia ka exam jong ka post Engineering Assistant kaba la pyniaid da ka Staff Selection Commission (SSC) na ka bynta ka All India Radio & Doordarshan. Na ka liang ka ERC – SSSS, ka pynpaw ka jingsngewnguh kaba khraw ia ka Dorbar Shnong Mawlai Iewrynghep kaba la ai sngewbha ia ka Community Hall ban pynlong shwa ia ka Career Guidance & Counselling Program.
Nangta ia ka Managing Committee jong ka Mawkhar Christian HS School hapoh ka jingpyniaid jong I Pastor P Hynniewta bad Babu Ron Syiem, Principal ka skul ban ioh ban pynlong ia ka Coaching Class kaba la neh la jan saw bnai. Ka Synjuk ka pynpaw ka jingsngewnguh ia I Samla Welson Pyngrope Engineer jong ka Doordarshan Kendra I ba pynlut por ban hikai ei ia ki samla pule kiba wan sha ka Coaching Class. Ka Synjuk ka pyrto ruh ia ki kyntien ksiar bad sbai rupa jong I Bah Barkos Warjri, IAS bad Additional Chief Secretary Meghalaya I ba la kyntu ia ki samla ban minot bha ha baroh ki liang lada ki kwah ban poi sha ka thong jong ka jingjop ha ki eksamin bapher bapher da kaba I la iathuh ruh ba I ruh I la pass ia ka exam IAS tang ha ka rta kaba 22 snem.
U la ong ba ka jingpule ia ki kot kiba bha kan iarap ban kyntiew ia ka jingnang jingstad jong u/ka briew. Ki samla ki la ioh ruh ka lad ban iohsngew ia ki kyntien kyntu kynpham na I Bah Morning Star Sumer (Columnist), Kong Pauline Nongkynrih Warjri bad I Bah Larry P Warjri, Acting Chairman cum Joint Secretary, ERC SSSS. Ka Synjuk ka ai khublei kyrpang ruh ia I Kong Roshan Warjri bad I Kong Aida Lyngdoh Nongrang (Kong Rit) jong Kyrsoi Khasi Food Mawkhar Main Road kiba la noh synniang lem sha ka thong ban pynshlur lem da ki jingaisngewbha jong ki ia ki samla wad kam. Khadduh iawai ka SSSS kaba long ka Seng Kmie jong Ki Seng Samla Shnong ka wer ia ki samla pule ban pynkhreh ialade ha kane ka exam khnang ba kin ioh kheit ia u soh uba thiang ha ka jingim jong ki. Khadduh ka SSSS ka kyrpad ba lada don kiba la pass Engineer bad kiba kwah ban ialeh ia ka Examination jong ka UPSC ha ka line Indian Engineering Service kin sngewbha ban thoh da ka shithi ryngkat bad ka resume jong ki sha Ka SSSS (ERC).(SP News)
