Shillong, Jylliew 13: U myntri ka tnad ka koit ka khiah u Bah AL Hek ha ka jingiadon ryngkat u Commissioner Secretary ka tand ka koit ka khiah jong ka sorkar jylla mynta ka sngi ka la pynshai paidbah ha kaba ia dei bad ka jingpyntreikam ia ka Meghalaya Health Insurance Scheme ha kane ka jylla Meghalaya.
Haba kren ha ki nongthoh khubor mynta ka sngi, na ka liang jong u Commissioner bad Secretary ka tnad ka koit ka khiah u Bah DP Wahlang, u la pynshai kdar ba ki paidbah kim dei ban sngewthuh bakla ia kane ka skhim. U la ong ba hapoh kane ka skhim ki don kid or kiba la buh da ka sorkar ia kaba la shim na ki kyndon jong ka RSBY jong ka sorkar pdeng.
Ban pynshai ia kane na ka liang jong u Commissioner u la ai da ka nuksa ba lada ka sorkar ba la buh ha kane ka skhim ban sumar ia ka jingpang ka long T.10000/- tyngka bad lada ka jinglut ka long T.11000/- tyngka u nongpang u hap ban siew ia ka pisa kaba tam na ka dor ba la buh na ka pla jong u. Ki don ruh ki jingpang ki bymdon ha kane ka skhim ia kum kine ki jingpang yn nym lah ban siew.
Ban ia tip ki paidbah la bthah ia ki hospital baroh ba kin wah ha ka hospital jong ki ia ka dor ba la buh khnang ba ki paidbah kin nym sngewthuh bakla. Ha ka juh ka por la iathuh ba ka sorkar kan sa pynkylla shen ia kane ka dor ban kham pynneh na kaba don mynta.
Na ka liang jong ka sorkar kahap ban siew sha ka ICICI Lombard ka health Insurance company kaba shim ia kane ka kam ha kane ka jylla ka long T.478 tyngka na ka bynta kawei ka MHIS Cards.
Na ka liang jong u myntri u la ong ba kane ka dei ka skhim kaba dang thymmai ki don ki jingbakla hangne hangtai ia kata ym lah ban biang, hynrei ka sorkar kan ia leh ban pynbeit.(SP News)
