Shillong, Nohprah 20: Ka Meghalaya Rural Bank (MRB) ba la ju tip ha ki por mynshuwa da Ka Bank Nongkyndong, Khasi bad Jaintia khlem da pynslem, hynne ka sngi thohdieng ha State Convention Center, Shillong, ka la plie ia 11 tylli ki tnad online ne branches ia kaba la plie da u Dr. Mukul Sangma,Myntri rangbah ka jylla ha ka jingdon ryngkat jong u Sanjay Kr. Magoo, CGM – LHO State Bank of India (SBI), P. Shyam Sunder, CGM – Reserve Bank of India (RBI), S. R. Bannerjee, Chairman – Arunachal Pradesh Rural Bank, Bhupen Deka, Chairman – Mizoram Rural Bank, Kong Rikynti Nongpiur, Chairman barim, Meghalaya Rural Bank, Mukul CH. Jeishi, Chairman, Meghalaya Rural Bank ba la pyniaid ia ka jingialang.
Kitei ki 11 tylli ki tnad online ki kynthup ia ka Laban, Mawiong, Mihmyntdu, Chutwaku, Nongrah, Zero Point, Nondein, Phulbari, Garobadha, Mahendraganj bad ka Mawhati. Ha kaba kheinlang baroh mynta ka MRB ka la don haduh 87 tylli ki tnad bad shen kan sa plie sa saw tylli ha Ampati, Resubelpara, Mawlasnai bad Diengpasoh.
Haba kren kum u Kongsan u Dr. Mukul u la iaroh ia ka MRB kaba la lah ban plie ia kine ki tnad online ka ban long ka jingmyntoi shibun na ka bynta baroh ki nongkynshew pisa jong kane ka bank. Kadei ruh kawei na ki bank,ba lah ban ong kaba bha tam ha ka ri, ha kaba tang hapoh ki lai snem ka la lah ban pynmih haduh 21 tylli ki tnad (Branches) bad ka la iarap ruh shibun ia ki samla, kaba ka la lah ban aikam aijam haduh da ki spah ngut ki samla khlemkam khlemjam.
“Kumba ka thong jong ka MRB ka long ban plie tnad shuh shuh sha baroh ki thain nongkyndong bad la khmih lynti ruh ba kan long kumta,” ong u Sangma bad u la iaroh ruh ba ka jingdon jong kane ka Bank ka la iarap ruh shibun ki briew kiba la lah ban ieng ha la ki kjat bad long trai ha ki kam kaba ki la ioh baiseng na ki.
U la kyntu ruh ia ka bank ba kan shimkhia ban iasnoh kti barabor bad ka sorkar haba ka pynlong ia kino kino ki prokram ai jinghikai ba kin kham tbit bad ban tip shuh shuh ha ka sap ba ki don, kum ha ki kam ri syier, ri sniang, ri dohkha bad kiwei kiwei ha ban airap airam ia ki khnang ba kin lah ban pynheh ia ka kam kaba ki la leh.
U la banjur ruh ia ka bank ba kan kham shimkhia bad kham noh kylluid mynsiem ka jingiarap sha ki kynthei, ba kynthup ia ki samla bad longkmie, kiba bun na kane ka thain ki tbit bha ban thain jain, khnang ba kin lah ban ieng ha la ki jong ki kjat.
Ha katei ka sngi la sam ruh ia ki khusnam sha ki branch kiba la jop, ha kaba ka MRB, Tura branch ka la ioh ia ka khusnam ba kiew sted tam, ka MRB, Jaiaw kum ka tnad ba dangmih thymmai ka la ioh ia ka best Emerging Branch, Improvement and house keeping, Riangdo branch bad kiwei kiwei.(SP News)
