Shillong, Jylliew 03: Ka Shillong Cricket Academy kala rakhe ia ka jingdap shi snem jong kane ka seng kaba peit kyrpang tang ha kaba ia dei bad ka kam ia lehkai criket ha kane ka jylla Meghalaya.
Ia kane ka jinglehkmen la rakhe ha Indoor Stadium, JN Complex Polo. U Deputy Chief Minister, Dr R.C.Laloo, haka jingkren ka jong u la ai ka jingiaroh ia kane ka kynhun kaba la trei shitom ban pynrung ha ki samla pule ia ka mynsiem ia lehkai.
Na ka liang jong u kongsan u la kyntu ia ki samla kiba don ha kane ka kynhun ba kin trei shitom bad leh ia kaei kaei naka bynta ban wanrah ia ka nam ka burom ia lade bad ia ka jylla baroh kawei da kaba shim ia kane ka jingialehkai kum ka kam, ia ki jinghikai kiba kyrpang ki ban ai da ka Cricket Academy ym dei ban pynlehnoh ei.
Na ka liang jong u Bah A.L.Hek, myntri ka koit ka khiah u la ai ka jingiaroh ia kane ka seng ha kaba ki la leh ban sei ia ki rang ia lehkai ha ka Criket. U ong ba u don ka jingkyrmen ba ki samla na kane ka jylla ha kawei ka sngi kin sa ia kynjoh kum kiwei ki nongialehkai Criket ha ka ri.
Na ka liang jong u president ka SCA,U Naba Bhattacharjee u la kren ha kaba ia dei bad kane ka seng u Bah Gideon Kharkongor, Director jong kane ka Academy ula ai ia ka kaiphot ha kaba ia dei bad ka jingtrei kam jong ka seng ha kane ka shisnem kaba la leit noh. (SP News)
