Shillong Lber, 23: “Bun ki briew ki khein ba ki jingpang ki long kiba shyrkhei bha bad ki jingpang kim long satia kiba shyrkhei namar ba la lah ban pynkoit bad pynkhiah ia ki hynrei ka jingpang kaba kham shyrkhei eh kadei ka jingbym tip ka jong ki briew ia ki jingpang bad kumno ban sumar ialade” la ong u Senior Medical nad Health Officer ka sorkar jylla u Dr B Pohchen haba kren ha ka jingrakhe ia ka World Tuberculosis Day kaba la pynlong da ka Rapsbun School of Nursing hynne ka sngi ha Don Bosco Anton Hall,Laitumkhrah.
U Dr Pohchen ula ong ba ki jingpang kim long kiba shyrkhei namar ba lah ban pynkoit bad pynkhiah ia ki hynrei ka jingpang kaba kham shyrkhei kadei ka jingbym tip ka jong ki briew shaphang jong ki. Nalor kane ula ong ruh ba ka long kaba kongsan ban ai jingtip bad pynsngewthuh ia ki paidbah halor ki jingpang ki bapher bapher namar ba bun ki paidbah kim tip eiei bad lada kim tip eiei ka long kaba eh shibun ban rat dyngkhong ia ki jingpang.
Une u doctor ula kyntu ba ki nongpang kidei ban dih pyndep ia ki dawai kiba ki doctor kila bthah ia ki ba kin dih khnang ba kin koit kin khiah bha bad ula ong ruh ka jingbym dih pyndep ia ki dawai ka long kaba ma namar ba ka jingpang ka lah ban khie im biang sa shisien kaban buh ruh ia ka jingim ha ka jingma.
Ha kawei pat ka liang ula ong baroh ki briew ki wad ia u dawai,hynrei ka dawai kaba bha tam kadei ka jingioh jingsumar da ka jingieit bad ka jingsumar kaba paka bad u dawai udeu tang uta uba kyrshan ban pynkhiah ia ka jingpang.
Ki nongkren ha kane ka jingialang kila pynpaw ba ka jingpang TB kadei kaba shah ktah lyngba u khniang Bacteria bad ia kane ka jingpang lah ban pynkoit da kaba suk hynrei lada ym sumar thikna u nongpang u lah ban duh ei iala ka jong ka jingim.
Kum shi bynta jong ka jingrakhe ia ka World Tuberculosis Day kaba hap ha ka 24 tarik mynta u bnai ha kylleng satlak ka pyrthei, ka Rapsbun School of Nursing kala rakhe ia kane hynne ka sngi ha kaba la iadonlang ryngkat u Regional TB Project Coordinator ka thain shatei lam mihngi u Dr Girish Ghosh, ka Principal jong ka Rapsbun School of Nursing ka Sister Jeeva Oliappuram bad kiwei kiwei kiba la shah khot sngewbha.
Ha kane ka sngi ki samla pule kila iashimbynta ha ka rwai ka shad bad ha kaban ak ha ka skit kaba lyngkot ban pynsngewthuh ia kiba wan sha kane ka jingialang shaphang ka jingpang TB kumno ban leh bad ban phah sumar ban ioh biang ia ka met kaba koit kaba khiah krat.(SP News)
