Shillong, Nohprah 03: Ka iing bishar kaba kyrpang kaba la thaw da ka sorkar ta
ng ban tian bihshar ia ki seng bhalang kiba ia khih ha kane ka jingdawa Inner Line Permit (ILP) ka la sdang ia ka jingtian bishar mynta ka sngi. Ha kane ka jingshong bishar ka la ai notice sha ki nongialam seng bhalang ba kin hap ban siew sha ka sorkar ia ka jingduh kaba T.31.09 klur na ka daw jong ka jingiakhih.
Ka seng Civil Society Women’s Organisation (CSWO) kaba la shim ia ka rai dang shen ban mih noh ha jingiakhih ILP mynta ka sngi ka la leit mih hapoh kane ka iing bushar ha khmat u nong bishar u R Rymbai.
Na ka CSWO la leit mih da ka president ka kong Agnes Kharshiing bad ka general secretary ka kong W Thabah, na ka liang jong ka iing bihsar ka la btah ia ki ba kin thung ia u muktiar jong ki bad ba kin ai ia ka jingkren jong ki sha ka iing bishar da ka jingthoh. Ia kane ka jingdawa ba la pynjulor ia ki jingdon jingem jong ka sorkar ka aid a u Bah B Khongwir under secretary jong ka tand political department jong ka sorkar.
Katkum ka jingthoh kaba la ai ka paw ba ka jingduh jong ka sorkar ka la kot sha ka T. 200 klur tyngka, kane ka kynthup ia ka tulop jong ki nongtrei sorkar bad T.25.94 klur na ka daw jong ki pakhang shnong kiba la iaid 10 sngi lynter bad ki pakhang ophis da ki seng bhalang bad ka seng lehnoh GNLA ha Garo Hills.
Ka jingduh jong ka jylla ruh na ki khajana ka long man ka sngi ka dei T.1.7 klur tyngka na ka tand lum khajna jong ka sorkar.
Ka kong Agnes haba kren ha ki nongthoh khubor ka la ong ba ki la pan por ban jubab ia katei ka jingujor jong ka tand political department ha kaba ia dei bad ka jingduh jong ka sorkar. Ka kong Agnes ka la ong ba ki seng bhalang kim don kti bad kine ki jingkynnoh jong ka sorkar hynrei don kiwei kiba leh ban pynsniew dur ia ki seng bhalang.
Ha kane ka jingkhein jong ka sorkar ka la khein lang ia ka jingduh ba pep trei ki nongtrei sorkar ha ki sngi pakhang shnong bad pakhang ophis, na ka liang jong ka kong Agnes ka la ong ba kim shym khang iano iano ban pep leit trei bad ka sorkar ka lah ban weng kam iano iano ruh lada ka kwah, na ka liang jong ka seng kan ia khun pyrshah ia kane ka jingkynnoh jong ka sorkar da ka ain.
Kiwei ki nongialam sengbhalang kim shym la wan mih ha khmat jong ka iing bishar kaba kyrpang mynta ka sngi, kum ka KSU. FKJGP, HNYF bad kiwei ki 11 tylli ki seng, na ka liang jong ka sorkar ka la kynnoh ba ka long beain ka jingkhang surok bad ka jingpakhang shnong.
Kine ki seng bhalang ki dawa na ka sorkar ba ka dei ban pyntrei kam ia ka ILP ha kane ka jylla ban khanglad ia ka jingwan jong ki briew kiba na bar jong ka jylla kumba leh ha ka jylla Arunachal Pradesh, Manipur bad Mizoram. Haba ia dei bad kane ka jingiakhih haduh mynta la kem 71 ngut bad la register mukotduma pyrshah ia ki.(SP News)
