SHILLONG K’Lyngkot 8: Katba ka election MDC kala nang jan ki sngi katta ka jingshong shit jong ki paidbah nongkyrshan ia la ki jong ki kyrtong ban trei shitom da ka jingthmu ban pynpoi ia ki sha ka thong jong ka jingjop bad kane kala jia ruh kumjuh ha Mawhati Constituency na ka bynta u Bah James Sylliang.
Haduh mynta ki paidbah kiba dei na ka Mawhati Constituency la ki dei na kano kano ka party ruh ba kynthup ia na ka party Congress, UDP ne wat kito kiba don ha ka shatri jong ka MCPC kiba don ka jingthmu ban kyrshan ia u Bah Sylliang ki dap da ka jingsngewhun namar ba ka lyer ba sawa jam tam ha kane ka Constituency ka dei beit tang ka kyrteng jong u Bah James Sylliang.
Hooid ym lah ban len ba ka jingiakhun ha kane ka election MDC na Mawhati Constituency kiba kham paw kyrteng ki dei beit hi tang lai ngut bad kita ki long u Bah RB Shadap, u Bah Otrill Pamshong hynrei napdeng kine baroh dei tang ka kyrteng jong u Bah James Sylliang ba sawa jam ha man la ki jaka ne ki shnong ki thaw lait noh tang kato katne tylli eh ki shnong hynrei kiba hun hi ki don ia ka mynsiem na ka bynta u Bah Sylliang.
Haduh mynta kiba ia knieh tiket na ka party congress ki don ar ngut ba kynthup ia u Bah Shadap bad u Bah James Sylliang bad baroh ar ngut na kine kiba pan tiket kila rai ba lada ioh ne duh ia ka tiket kin iaid beit sha khmat ban aireng ha kane ka MDC election hynrei na ka liang jong briew kiba dei na ka party congress kida thrang eh ba ka tiket kan wan sha u Bah James.
Na ka liang jong u General Secretary jong ka Youth Congress jong ka Mawhati Block u Bah Never Makdoh lem bad kiwei de ki nongkit kam jong ka party congress kila ong ba lada ki nongialam jong ka seng congress ki ai tiket ia u briew u bym don ia ka thong ban ioh ia ka jop ka lah ban poi sha u pud ba ngi hap ban mih na ka party wat lada ngi la long doh long snam ha ka party congress.
Haba ioh ban ia kren bad ki katto katne ngut ki paidbah kiba dei na ka Mawhati Constituency da kawei ka jingmut kila pynpaw ba ha kane ka kynti kaba mynta ngin ym phai khmat shano shano ruh lait tang ia u Bah James Sylliang namar ba u dei u samla uba dang thymmai ha kane ka jylli jong ka sain hima sima bad u bym pat don dak sniew haei haei ruh.
“Kum ki paidbah ngi don ka jingkyrmen ha u samla ba yn ialam ia ngi ki paidbah ha kiba bun ki bynta namar ba ka rta ka jong u ka dang biang palat ban kit ban bah ia ka jingeh jong ka Constituency ha ki ba bun ki snem ki ban dang wan hynrei ym kum ia kiba la kham rangbah bad noh ka met ka phad bad kine ki ar ngut ki riewrangbah kin ym lah hi ruh ban shakri bun snem na ka bynta ki paidbah jong ka constituency hi baroh kawei” la ong u wei na ki paidbah haba iakren bad u nongthoh khubor.
Haba pynshong nongrim ia ka jingioh sngew ia ka sur jong ki paidbah kiba ia kren ha ki shnong ki thaw ki iew ki hat la sngewthuh ba ia ka jingkhlain bad ka jing tlot jong ki kyrtong kiba iakhun na ka bynta kane ka election MDC 2014.
Ha kaba iadei bad ka thain naduh na ka shnong Bir ter ter haduh ban da poi sha ka shnong Umkra ka kyrteng jong u Bah James Sylliang ban ia kiwei kiweikiwei ki kyrtong ka kham sawa bun shah ban ia ki bad ym tang katta hynrei kane ka juh ka jingsawa kala sawa bad ka lyer kaba beh bha sha ka thain naduh na ka shnong Nongjri ter ter shaduh ban da poi sha Amjong ka dei hi tang ka kyrteng jong u Bah Sylliang ba wan sha khmat eh.
Shuh shuh lada ka jingthmu ka Executive Member (EC) jong ka Khasi Hills Autonomous District Council (KHADC) ban phiah ia ka constituency kan trei kam la tikna ba u Bah James Sylliang yn poi sha ka thong khlem jingartatien namar ba kane ka thain shilliang Umiam lah ban ong ba ka dei ka ktem ba heh bad yn ym don mano mano ba lah ban pynkhih ia ki namar ba kila dep ban kular ban kyrshan tylli mlon ban ai jingjop ia u Bah Sylliang. (SP News)
