Jowai, Jymmang 12: Ka rai jong ki shiphew ban pynlong ia ka jingpakhang surom miet kaba 48 kynta kan sdang la shai ka sngi lada ka sorkar kam lah ban maramot ia ka surok Bah ban leit na Jowai sha ki bynta jong ka jylla Assam.
Katkum ki jingtip kiba la ioh da u SP News Agency na ka tnad shna shurok jong ka sorkar jylla la iathuh ba ia kane ka surok la aiti da ka PWD sha ka National High Way Authority jong ka Ri India bad ia kane ka jingshimti ia kaneka surok da ka NHAI la pynmih ha ka jingpynbna jong ka sorkar pdeng ha ka 14 Nailur jong u snem 2012.
Katkum kane ka jingpynbna jong ka sorkar pdeng ka long ba ia ka surok naduh ka 69.2 km na Jowai haduh 173.2 ha Malidor la aiti ia kane ka surok sha ka NHAI, hynrei ia kane ka surok haduh mynta ka NHAI kam shym la shimti lane ban maramot ia ka.
Naka liang jong u MLA katei ka jaka u Bah Justine Dkhar haba kren ha u SP News Agency u la ong ba u la dep ia kren ia kane ka kam bad u myntri ka tnad shna surok jong ka jylla u Bah Sngewbhalang Dhar, ha kane ka jingiakren na ka liang jong u Bah Dhar u la ong ba kane ka surok ka la dei ka jong ka NHAI.
Na ka liang jong ki paidbah pat ki kwah ban ka sorkar ka dei ban shna ia kane ka surok lem kumta kapakhang surok miet kan iaid beit kumba la dep ban pynbeit. Ki paidbah ki kwah ba ka surok kan bha.(SP News)
