Shillong, Naitung 28: Ka Executive Committee jong u Bah Ardent M Basaiawmoit ha Khasi Hills Autonomous District Council (KHADC) la shai ka sngi kin sdang ia ka jingleit jurip pud hapdeng ka jylla Meghalaya Bad ka Assam ha kaba kin sdang na Sabuda hapoh jong ka Ri Bhoi District.
Bun na ki nongpeit pyrman ia kane ka jingleh jong ka KHADC ki ong ba kam nym don kano kano ka jingmyntoi namar ba ka District Council kan nym don kano kano ka bynta ha ka jingiadei bad ka jingpynbeit ia u pud u sam hapdeng ki ar tylli ki jylla. Kane ka jingleit ka long tang ban pynthame ia ki paidbah ki MDC ruh ki sngewthuh ia kane ka bynta.
Lada ki MDC ki sngewkhia haduh katta katta ia ka jingbym lah ban ia pynbeit ia u pud u sam hapdeng ka jylla Meghalaya bad ka jylla kaba la wan rah ia shibun ki jingjia ki bym sngew tynnad kila dei ban pynbor ia ka sorkar jylla da kino knio ki lad ki lynti ba ka sorkar ka dei ban leh ei ei noh namar ba kane ka jingiakajia pud bad ka jylla Assam kam dei tang ka jylla Meghalaya, Hynrei ka jylla Nagaland, Arunachal Pradesh bad kiwei ki jylla kiba ia khap bad ka.
Ki nongpeit pyrman ki pynsngew ba lada ka KHADC ka sngewkhia haduh katta katta ia ka jingbym lah jong ka sorkar ban ia pynbeit ia ka jingiaka jia pud ka la de ban lam lynti ban khot lang ia ki ar tylli ki District Council ka JHADC bad ka GHADC ba kin ia mir jingmud kumno ban ia kren bad ka sorkar ha kaba ia dei bad kane ka kam.
Ha ka juh ka por na ka liang jong ka sorkar ruh kam lah ban shu kiar na ki District Council ha kaba ia dei bad ka jingpynbeit pud pynbeit sam namar ki ruh ki tip ia la ki jong ki jaka putta namar ki Syiem ki Doloi bad ki Nokma ki hap ha ka jingpeit jong ki District Council ha kaba ma ki ki tip kham bha ia u pud u sam jong ki.
Ban pynbeit ia u pud u sam hapdeng ka jylla Meghalaya bad ka jylla Assam ban shu ia kam markylliang ba kane ka dei ka jaka jong ka Meghalaya bad katai ka dei jong ka jylla Assam kan nym lah ban poi haei haei ruh namar ka jylla Meghalaya ka la dep ban kyntait ia ka Chandra Chuk Committee. Kaba lah ban pynbeit ka long ba baroh ar tylli ki jylla ki dei ban pdiang ia ka policy shim bad ai (Gift and Take) ong ki nongpeit pyrman. Ki nongmih khmat paidbah lada ki sngew khia ia kane ka kam ki dei ban ia klet noh ia ka jingsngew iapher seng sain pyrthei.(SP News)
