Shillong, Naiwieng 13:Ka Synjuk 20 Shnong Association ka la shim ia ka rai ban pynlong da ka pakhang ba khlempud ia ka Leshka (Project Area) ka ban sdang naduh lashai ka sngi 14 tarik. Ia kane ka rai la shim ha ka jingialang kaba la long hynne ka sngi Balang.
Haba kren bad u Nongthoh Khubor, u Bah Portanri Pakyntein, President ka 20 Shnong Association ula ong, ba ka synjuk ka ka shim ia kane ka siem jam ban pynlong da ka pakhang ba khlempud ia ka Leshka, ka dei halor ka jingleh mynthi ka MeECL ban pynurlong ia ki jingdawa na bynta ban pynshkem ia ki Casual Labour kiba la trei la bun bun snem.
Ula ong, na ka liang ka synjuk ka la dawa ban pynshkem ia kitei ki nongtrei naduh ki snem ba la dep, bad ki bor ka MeECL ruh ki la kular ba kin sa leh hynrei kine ki jingkular ki long tang ban shu pynbiej kai namar hadien ba la kut ka por ruh kim shym leh eiei.
Kumta, ka synjuk ba kynthup ia ki 20 thylli ki shnong kiba shah ktah ha katei ka project, da kawei ka jingmut ki la rai ban pynlong syndon da ka pakhang trei ba khlem pud naduh lashai ka sngi tad haduh ba ka MeECL kan pynurlong ia katei ka jingdawa ka synjuk, ula bynrap. (SP News)
