Shillong,Nohprah,o6: U Bah Latiplang Kharkongor MDC jong ka Malki Nongthymmai u la ong ba lada ym lah ban ai ia ka Inner Line Permit ha kane ka jylla Meghalaya kumba ka paw na ka jingkren jong u myntri rangbah ka jylla u Dr Mukul Sangma, lada ka dei shisha ka sorkar pdeng ka la dei ban ai ia ka jingsynshar da lade ia lade kumba ka ai ia ka jylla Jammu & Kashmir.
Kumba ka paw ba ka sorkar pdeng kam lah ban ai ia ka jingmynjur ha kaba ia dei bad ka jingdawa jong ki seng bhalang ban pyntrei kam ia ka ILP ha kane ka jylla. Lada ka long ha kane ka rukom ka sorkar ka la dei ban ai pat da kano kano ka lad jingiada kumba ka laleh ia ka jylla Jammu bad Kashmir.
U Bah Latiplang u la ong ban pyntrei kam ia ka ILP ha kane ka jylla Meghalaya kam dei ba ka sorkar jylla ka hap ban leit pan bor na ka sorkar pdeng hynrei ka long tang ban shupynmih ia ka hukum namar kane ka ain ka la dep ban don lypa.
Kumba ka long ki paidbah jong kane ka jylla ki kwah ban ioh ia ka jingiada na ka jingwan tuid ki briew kiba na bar da ka ILP kumta ban wanrah ia kiwei ki ain kam don jingmyntoi ei ei ruh em la pynkut u Bah Laptiplang.(SP News)
