Shillong, Risaw 28: U principal jong ka skul St Edmund mynta ka sngi u la ai ia ka jingujor sha Laitumkhrah police station, ba ki la don ki briew kiba ym lah ban ithuh kumba saw ne san ngut kiba la wan ban thok ia u wei na ki khynnah skul da kaba ong ba u kpa jong u ta u khynnah u la ia tyngkhuh kali ba u dei ban leit bad ki.
Katkum ki lad khubor kiba la ioh la ong ba ha ka por 8.30 baje mynstep ki briew kiba ym lah ban tip ki la leit sha katei ka skul bad ia kynduh ia u Pynksan Syiem u khun jong u Bah Manbha Dkhar da kaba ong ba u kpa jong u la ia tyngkhuh kali ba u dei ban leit lang bad kitei ki briew.
Na ka liang jong u tei u khynnah u la sngewpher ia kane ka jingong jong ki tei ki briew bad u la leh mynleh ba un leit sha painkhan bad u la ioh ban phet bad pyntip sha ki bor jong ka skul. Na ka liang jong u principal mar ia ioh ia kane ka jingtip u la leit ban ujor sha ki pulit jong ka Laitumkhrah.
Na ka liang jong ki pulit ki la shim khia ia kane ka kam bad ki la register case ia kane ka jingujor hapoh ka kyndon rahbor.(SP News)
