Shillong, Naitung 24: Ki bor shipai kiba pyniaid ia ka jingpynrung kam shipai kaba dang iaid mynta ha Madan polo ha ka bynta kaba ar ki la lap ba ki don 60 ngut ki samla kiba kwah ban ioh rungha kane ka kam shipai da kaba ai da ki certificate thok.
Ia kine ki 60 ngut kibor shipai ki la aiti sha ki pulit jong ka jylla ban leh ia kaba don kam. Na ka liang jong ki pulit ki la kem ia ki bad la register mukotduma pyrshah ia kine ki briew kiba la pyni da ki kot ki sla kiba thok.
Kaktum ki lad jingtip kiba la ioh da u SP News Agency ki iathuh ba katkum ki kot ki sla kiba la paw ha ka jinglap jong ki shipai la ong ba ki dei na ka jaka Dimapur. La ong ba kine baroh 60 ngut ki dei na ka jylla Bihar.
Kane ka jingpynrung kam shipai kaba dang iaid mynta ha polo ka dei tang na ka bynta ki samla jong kane ka thain shatei lam mih ngi jong ka Ri India ha kaba ia kiba nabar jong kane ka thain ym shym la ai lad ha kane ka kynti kaba mynta.(SP News)
