Jowai, Jylliew 30: Ka Jaintia Youth Federation JYF Central Body ka la pan da ka RTI ban tip halor ka jingthied par mawshun ki cement company ha Elaka Narpuh, Elaka Sutnga bad Elaka Rymbai ba haduh katno ki cement company ki la dep thied bad register ha JHADC kaba dei ka nongpeit nongda ia ka khyndew ka shyiap ha jaintia hills.
Ka Jingthied par mawshun da ki cement company ha jaintia hills ka long kaba la shyrkhei, da ki hajar tylli ki jaka ba ki la dep thied na ki nongdie tangba kim ju wan register ne pyntip sha ka District Council
katkum ba ka dei ia ki ban transfer ia ka land holding certificate ba ki la dep thied na u/ ka trai khyndew, ka ne hi ka paw shai ba ki company kim khein snep ia ka JHADC kaba la pynkup bor ia ka da ka 6th schedule ong u bah P.Majaw President ka JYF Sengkmie.
Ka ba pynlyng ngoh shuh shuh hangne ia ka seng ka dei ba ki cement company kim shym la wan ban pan jingbit (Prospecting Licence PL) lane ka (Mining Lease ML) na ka Distric Council ha shwa ba kin pyntrei ia
ki jaka ban sei ia u mawshun napoh khyndew ba ki la thied na ki trai jaka, hynrei tang katto katne tylli ki land holding la lap lyngba ka RTI ba ki wan aiti ha ka office ka District Council.
Kawei pa ka wei ka Jaka ba ki cement company ki la dep thied na ki trai jaka, kim ju wan ban pan jingbit ban tih mawshun na ka District Council namar ba ki hap ban siew ia ka bai NOC kaba Rs. 10,000/- ha man la kawei pa kawei ka jaka ba ki thied bad lada don sa ki dieng ha ka ne jaka ka jingsiew (Royalty) kan nangheh shuh shuh bad kan poi da ki lak tyngka ban ioh ia ka NOC,
Naka liang jong ka JYF ka buh ka jingkylli balei ka JHADC ka aimon kumne ia ki cement company ban tih mawshuh khlem ka NOC lane khlem ka bai NOC, imat ka leit sha ka pla lajong ne ki klet ia ka bor ba la pynkup ha ki da ka 6th schedule ban peit ia ka iap ka im jong ka District Council lyngba ka khyndew ka shyiap, namar lada khein ia ka jingbun ki jaka ba ki company ki thied na ki briew jong ka Jylla ka bai NOC kan kynjoh da ki klur klur tyngka bad kan long ka jingkyrkhu kaba khraw bad ka jingmyntoi ia ka pla tyngka jong ka JHADC ong u bah Majaw.
Lada ki Cement company kim buh dor ne burom ia ka JHADC, hato dang don kiwei pat ki bor ba ki ioh jingbit ban tih mawshun khlem ka jingtip jong ka District Council? Lada em ka mut ba ki MDC jong ka JHADC kim don jingkit khlieh ban wanrah ia ka jingmyntoi na ka bynta ka council, kane ka mut ba ki shu long MDC khlem sngewthuh ia ka iktiar la jong, ban peit ia ka iohnong ka duhnong jong ka District Council kynthoh shuh shuh u Preisdent.
Kumta na ka liang bah P.Majaw Preisdent jong ka JYF u ong ba kim sngewtynnad ban tip ba ka JHADC ka tyrkhong ne kam don Fund ban siew tulop ia ki nongtrei lajong, namar tang na ki cement plant ruh ka jing ioh nong jong ka District Council kan long kaba pahuh pahai bha lada ki MDC ki shimkhia bad pyndonkam hok ia ka iktiar lajong kum ki nongmih khmat ba la pynkup bor ha ki da ki paitbah pynkut u kyrwoh na u bah Majaw.Ka JYF Lyngba Ka RTI Ba KI Cement Company Kim Burom Ia Ka JHADC
Ka Jaintia Youth Federation JYF Central Body ka la pan da ka RTI ban tip halor ka jingthied par mawshun ki cement company ha Elaka Narpuh, Elaka Sutnga bad Elaka Rymbai ba haduh katno ki cement company ki la dep thied bad register ha JHADC kaba dei ka nongpeit nongda ia ka khyndew ka shyiap ha jaintia hills.(SP News)
