Nongpoh, Jymmang 28:Ki Rangbah Shnong ka Umtrew River Protection Committee ki la byrngem ban khang khyrdep noh ia ka Kompani ri syiar ha Ri-Bhoi halor ka jingpynlait jaboh sha ka tlong umbam umdih, bad tan ghadien shisngi la lap biang ki Rangbah Shnong ki la lap sa ia ki kam pynkhein ain katei ka Kompani kaba la kam ba ka la thied duh ia katei ka jaka ba la ri syiar khlem pat da ioh bor da ka Single Window Agency ka sorkar jylla.
Ha ka sngii ka sngi nyngkong jong ka taiew ki Rangbah Shnong ka thain Umsning ha ryngkat ka Magistrate ki la leit ban jurip ia katei ka Kompani bala tip kum ka Meghalaya Agrovet Private Limited, Company la lap sa ia ka jingshisha ba katei ka Kompani ka la pyniaid ban ri syiar khlem da don ki kot ki sla kiba paka ne khlem pat da ioh bor na ka sorkar.
Kane ka jingshisha ka paw hynnin ka sngi hadien ba na ka liang ka bor District jong ka Ri-Bhoi ki la khot hajir ia ki bor ba dei peit katei ka Kompani ha ophis ka Deputy Commissioner ka Ri-Bhoi, hynrei kaba sngewlyngngoh pat ba katei ka Kompani kam shem la lah ban pyni ia ki kot ki sla ba ka la ioh bor na ka sorkar ban pyniaid ia katei ka Kompani ri syiar kaba don ha Mawthei bad ha 9mer ha ka thain Mawhati.
Kumba la iathuh da u Bah F. Nongkseh, Chairman ka Umtrew River Protection Committee, u la ong ba ha ka jingtohkit ka bor district mynta ka sngi ha ophis ka DC la lap ba katei ka Kompani ka don tang ia ka Trading License ba la ioh na ka District Council bad katei ka Trading license ruh ka dei kaba la kut ka por khlem da pynthymmai shuh.
U la ong ruh katkum ka jinglap ia ki kot ki sla katei ka Kompani la dei ban khang khyrdep noh ia katei ka Kompani ri syiar kaba la pyniaid beain ia katei ka kompani ri syiar, namar wat haduh mynta ba la dap da ki snem tam ba ka la pyniaid ha kaba ri syiar katei ka Kompani kam don satia ia ki kot ki sla ba pura ba ka la ioh bor na ka sorkar.
Kaba sngewlyngngoh shuh shuh kumno katei ka Kompani kan ioh ban thied jaka na ka bynta ban ri syiar bad kumno ruh ka ioh ban pyntreikam ia katei ka Kompani khlem pat da ioh bor na ka Single Window Agency ka jylla� la ong u Bah Nongkseh.
U la iathuh ruh kumba la sakhi lyngba ki kot ki sla ba la wan rah da ki bor ba dei peit katei ka Kompani, katei ka Kompani ka don tang ia ka trading license ha kaba la paw ruh ia ka kyrteng u Bhalang Singh Phanbuh kum u Director katba ia ka Kompani pat la pyniaid da ki bar jylla kaba paw shai ka dei tang ka jingleh binami, la ong u Bah Nongkseh.
u la ong ruh ha ka jingshisha katei ka Kompani kaba la ri syiar da ki phew hajar ki syiar ka la dei kawei na ki kynja Karkhana kaba heh kaba la lah ban pynmih da ki phew hajar tylli ki syiar, hynrei kaba sngewlyngngoh pat ka long ba kam pat ioh ruh ia ka bor ban pyniaid ia katei ka kam ri syiar na ka Meghalaya State Pollution Control Board kaba iada na ka jingpynmih jaboh jong ki Kompani ne ki Karkhana kumba la lap ba ka la pynlait ia ki jaboh eit syiar wat sha ka tlong umbam umdih jong ki paidbah Nongshong shnong.
Ki Rangbah Shnong bad ki paidbah Nongshong shong kiba shah ktah na ka jingleh jaboh katei ka Kompani ki la dawa ia ka bor District Ri-Bhoi bad wat ia ka District Council ka dei ba khang khyrdep noh ia kane ka Kompani u la ong. (SP News)
