Shillong, Jymmang 10: U MDC ka Mawhati, u Bah James Sylliang, u Gramsebak ka Umsning C&RD Block bad kynthup ruh ia ki nongialam ka FKJGP na Umsning Circle bad ka RBYF Umsning Circle mar mar ia ioh jingtip halor kane ka jingjia kaba la ktah ia ka shnong ka thaw na ka jingwan khywit kaba kynsan kynsan jong ka eriong, mynta ka sngi kitei ki nongialam ki la leit ban jurip sha kitei ki lanot ba la shah ktah ha kane ka eriong kaba jur.
Hadien ba la sakhi ia kane ka jingshem lanot jong ki paidbah nongshong shnong jong ka konstituensi, na ka liang u MDC u Bah James Sylliang, u la kular ban shim khia na ka bynta ban ia kren sha ka bor District bad kumjuh sha ka sorkar na ka bynta ban phah kham kloi ia ki lad jingiarap.
Ban kner ia ki jingsngewlem sha kitei ki lanot na ka liang ki nongialam ka FKJGP, Umsning Circle hapoh ka jingialam jong u general secretary Samla Bines Kylla ki la leit ban noh synniang shisyndon da kaba iarap da u khaw lai packet na ka bynta ban ai bam ia kito ki lanot kiba ym don ing don sem shuh ba la aiti sha u Rangbah ka Shnong Sohpdok.
Katba na ka liang ka RBYF Central body ha ka jinglam lynti da u Bah J.J Lapang kum u president ka Umsning Circle bad u Bah P.P Kylla, Publicity Secretary ka seng kmie, ki la iathuh, ba kum ka seng hi ka dap da ka jingsngewkhia halor kane ka jingjia, bad kum ka seng hi shen kan noh synniang da ki tin kumba 15 ban sha kitei ki lanot ba kum ka seng kan leit aiti noh sha kito ki longing kiba mad ia kane ka apot.
Ki nongialam jong kine ki ar tylli ki seng ki la kyrpad jur ruh sha ki bor ba dei peit jong ka sorkar bad sha ka bor District ba kin shim khia ruh ban phah noh ia ki lad jingiarap sha kitei ki lanot, namar kumba long mynta ki la donkam ban ioh noh ia ka jingiarap hadien ba la shah pynpra ki ing ki sem, ki la bynrap.
Shuh shuh halor katei ka jingjia, na ka liang ka Dr. Pooja Pandey, ka Deputy Commissioner ka Ri-Bhoi District ruh halor kane ka jingjia ka la pyntip ba ka la phah ia ki bor ba dei peit ka sorkar na ka C&RD Block ban leit jurip sha kitei ki lanot ba la shah ktah bad ban tohit halor ka jingjulor ba ki la shah ktah ban a ka liang ka bor District ruh kan sa phah kham kloi ia ki lad jingiarap na ka bynta kito ki lanot kiba la shah ktah.(SP News)
