Jowai, Jymmang 13: Ka AJYWO sengkmie, ka la leit buh da ka jingujor ha u Chief Executive Member jong ka Jaintia Hills Autonomous District Council halor u wei u Nepali u ba kam Rangbah Shnong ia lade jong ka shnong kaba la khot Umthe kaba hap hapoh u pud u sam jong ka Elaka Sutnga ka shnong kaba la shong la sah tang da ka Nepali suda.
Kat kum ki sakhi sa but kiba ka AJYWO ka la ioh, la lap ba utei u Nepali ia uba ym pat shym la ioh kyrteng satia u la kam Rangbah shnong ia lade jong ka shnong Umthe ka kyntoit kaba la shong la sah tang da ki Nepali suda da ka ba u la nud ban ai syrnot jinglong trai shnong (Permanent Residential Certificate) ia u wei u Nepali u ba kwah ban applai ia ka kam shipai ialade. “Ka long kaba lyngngoh ba kumno u Nepali u ba wan na kawei pat ka ri u nud ban kam Rangbah Shnong ia lade ha ka jaka kaba hap hapoh u pud u sam jong Jaintia Hills kaba hap hapoh ka jingkdup jong ka 6th scheduled jong ka Constitution jong ka ri India. Kane ka long kaba beain haduh katta katta kat kum ka United Khasi-Jaintia Hills Autonomous District (Appoitment and Succession of Chiefs & Headmen) Act, 1959.” Ong u Bah M H Dkhar President jong ka AJYWO Sengkmie.
“Kat kum ka RTI, la lap ruh ba ka JHADC lyngba jong ka Administrative Department jong ka, la iathuh shai ba ka JHADC kam ju tip lane bna lane ithuh ei ei ruh em ia kata ka shnong Umthe lymne ia uta u Rangbah Shnong Nepali jong ka,” la bynrap shuh shuh u bah Dkhar.
U Bah M H Dkhar u la ong shuh shuh, “Wat la ka seng kam pat shym la ioh lad ban ia kynduh markhmat bad u CEM jong ka JHADC ban iakren sani bha bad u halor kane ka Shnong Umthe bad ruh une u Rangbah Shnong Nepali, hynrei ka dorkhast jingujor jong ka seng ka la iaid sha khmat ha ryngkat ki jingdawa na u CEM ban pynshitom noh ia utei u Nepali ba nud ban kam Rangbah Shnong ia lade khlem ka jingithuh lane ai bor jong ka JHADC bad ruh ban pynduh jait noh shisyndon ia katei ka shong Umthe ia ka ba la buhai shnong tang da ki Nepali suda”.
Ha ka jingujor kaba ka seng ka la ai sha u CEM jong ka JHADC, ka AJYWO ka la dawa tyngeh na u CEM ban shim khia ia kane ka kam namar kalong kaei kaei ka kam kaba buh ia ka ri bad ka jaidbynriew rit paid ha ka jingma kaba khraw. “Ka jingbun paid jong ki Nepali ha Jaintia Hills ka la long kaba shyrkhei bad lada jia ba baroh kine ki Nepali kiba don ha Jaintia Hills lane wat kiba na Khasi Hills ruh kin wan pan Permanent Residential Certificate na utei u Rangbah Shnong Nepali jong ka shnong Umthe, kane kan long ka jingma kaba khraw ia ka ri bad ka jaidbynriew rit paid jong ngi” ong u shuh shuh u Bah Dkhar.
Ka AJYWO ka dawa ruh na ka office jong u Deputy Commissioner bad ruh na ka Office jong u Superintendent of Police, East Jaintia Hills District ban peit ngor ia ki nepali kiba kam trai shnong ia lade ha Jaintia Hills lyngba jong katei ka shnong Umthe da ka jingioh ia ka syrnot jinglongtraishnong na utei u Rangbah Shnong Nepali jong katei ka shnong Umthe ba kim dei ban ai Domicile Certificate lane Permanent Residential Certificate (PRC) ia ki ba kum kitei ki khylla jait bad ki nongwei.
“Lymda ka JHADC kan pynduh jait ia katei ka shnong Nepali bad pynshitomm ia utei u Rangbah Shnong Nepali jong ka, halor ka jingleh mynleh Rangbah Shnong jong u khlem da ioh bor na ka JHADC, ka AJYWO kan nym shong kli kti satia”, pynkut u bah M H Dkhar. (SP News)
