Shillong, Kyllalynkot 13: Ka All Jaintia Youth Welfare Organisation, Central Governing Body namar ba ka general election sha ka Ingdorbar Thawain jong ka jylla Meghalaya ka la jan, ka seng ka maham ia baroh ki nongkitkam bad ki dkhot jong ka ba kin kiar ia lade na ka ba ia kyrsum lang bad ka politics. Ha u kyrwoh khubor ba la pyllait da u President jong ka AJYWO-CGB, U Bah M H Dkhar, ka seng ka maham tyngngeh ia ki dkhot jong ka baroh ban ym ia khleh jaktung lane ia kyrsum lang bad ki kam politics ha kane ka election sha ka Ingdorbar Thawain ka Jylla Meghalaya. “ Ka AJYWO ka dei ka sengbhalang trei mon sngewbha ka bym don jingiadei lane jingiasnoh ei ei ruh em bad ka kam sain hima sima (politics) lane bad kano kano ka kynhun sainhima sima (political party) hynrei ka dei ka sengbhalang trei mon sngewbha na ka bynta ka bha ka miat jong ka imlang ka sahlang bad ruh jong ka Ri bad ka Jaidbynriew” ong u Bah Dkhar. “Ka Riti Trei Kam (Constitution) jong ka seng ka kren shai ba kan ym ailad ia uno uno lane kano kano na ki dkhot jong ka ban don jingiadei bad ki kam politics lane ban ia kyrsum lang bad kano kano ka political party ha ki kam politics (Partisan Politics). Lada ka lap ia ki ba kum kita, ka seng kan ym map hynrei kan sa pynshitom ia kiba kum kita ki jaid dkhot kat kum ki Riti Trei Kam jong ka seng ka ba lah ban ialam wat shaduh ka jingshah beh seng jong kiba kum kita ki dkhot” bynrap shuh shuh U Bah Dkhar. “Katba, ki dkhot jong ka seng ki lah ban thep ia la ka jong ka vote na ka bynta uno uno lane kano kano na ki candidate ba ki mon hynrei ym pat de ban ia kyrsum politics kum ha ka ba ieng ha ki platforms bad ialap na ka bynta jong uno uno lane kano kano u lane ka candidate lane na ka bynta kano kano ka political party. Ka seng ka pyrkhing bha ia kane bad kan pynshitom ia ki ba iaid lait ia kane ka jingmaham jong ka seng. Kumta ka seng ka maham jur ia baroh ki dkhot jong ka ba kin long ki ba kiar na ka ba ia ia kyrsum politics” Pynkur u kyrwoh na ka AJYWO.
